Notícies Veir istoric
Vielha e Mijaran participe ena hèira Expotural de Madrid enquiath 4 de noveme
Eth municipi ei present damb un stand en tot promòir era sua aufèrta toristica e era dera Val d’Aran amassa damb diuèrses enterpreses deth territòri
Entre er 1 e eth 4 de noveme, Vielha e Mijaran participe ena 1èra edicion dera hèira Expotural en recinte IFEMA de Madrid. Ua hèira dirigida a promòir era natura, eth clima e eth torisme d’Espanha, a on i a representades enquia 11 Comunitats Autonòmes, e tanben diuèrses destinacions de montanha de tot eth mon.
Vielha e Mijaran participe damb un stand en tot promòir era vasta aufèrta toristica qu’aufrís eth municipi, e ac hè en collaboracion damb diuèrses enterpreses deth territòri. Eth baile municipau, Juan Antonio Serrano, participèc en acte inaugurau d’Expotural, a on i auec ua amassada entre bona part des bailes espanhòus e de d’auti païsi, en tot èster recebudi pera bailessa de Madrid, Manuela Carmena.
“Era participacion de Vielha e Mijaran ena hèira Expotural ei ua grana oportunitat entà qu’eth municipi pogue balhar informacion toristica deuant de fòrça gent arribada de fòrça endrets d’Espanha e de fòrça païsi”, comente eth baile de Vielha e Mijaran, Juan Antonio Serrano.
Expotural acuelh ua ampla aufèrta de torisme de nhèu e montanha, e tanben celèbre eth 1èr Fòrum Internacionau de Torisme de Natura e Torisme Sostenible. Eth pabalhon numerò 6 d’IFEMA-Feria de Madrid destine un totau de 10.000 mètres quarradi de superfícia entà complir damb aguesti objectius.