Notícies Veir istoric
Er Ajuntament de Vielha e Mijaran met en foncionament era 4au edicion dera programacion culturau familhara “Vielha en Scena”
Eth cicle cònste de sies actuacions que comence en noveme e finalizarà en abriu
Eth pròplèu 3 de noveme comence ua naua edicion deth cicle de programacion culturau familhara “Vielha en Scena” qu’amie a tèrme er Ajuntament de Vielha e Mijaran en collaboracion damb era associacion Aran Teatre. Enguan, aguest cicle arribe ara 4au edicion, e ei format per un totau de sies actuacions qu’auràn lòc un dissabte ath mes pendent eth cors escolar.
Eth 3 de noveme s’encèten es activitats damb er espectacle “Minuts” a cargue de Marcel Gros. Er 1 de deseme i aurà era actuacion de Charlie Mag, titolada “Formidable”. En 2019, contunharàn es activitats eth 12 de gèr damb er espectacle “La Gallina dels Ous d’Or” de ZZ Teatre. Eth 2 de hereuèr La Tal aufrirà “Italiano Grand Hotel”. Eth 2 de març, El Sidral presentarà “Nora i el Conte Perdut”, e eth 6 d’abriu, eth cicle Vielha en Scena barrarà es pòrtes damb Festuc Teatre e era sua actuacion “Adèu Peter Pan”.
Totes es actuacions s’amiaràn a tèrme ena Sala Era Audiovisuau de Vielha entàs 18:00 e a un prètz de 5€. “Damb aguesta 4au edicion de Vielha en Scena, consolidam ua aufèrta fòrça divertida entara mainadèra, damb prètzi populars”, comente era còsso de cultura de Vielha e Mijaran, Maria Vergés. E hig que “aguest cicle se some a totes es actuacions gratuïtes qu’er Ajuntament aufrís pendent tot er an as mès petiti e dubèrta a toti es publics”.