Notícies Veir istoric
Era Bibliotèca Generau de Vielha presente es activitats deth sòn 17au aniversari
Enquiath pròplèu 19 de noveme s’amien a tèrme eth 3au Concors de Microrelats e eth 2au Concors de fotografia “Eth mèn repopet”
Pendent aguesta tardor, era Bibliotèca Generau de Vielha commemòre eth sòn 17au aniversari, e ac hè damb diuèrses activitats dirigides a toti es publics en collaboracion damb er Ajuntament de Vielha e Mijaran.
Per un costat, a metut en foncionament era 3au edicion deth Concors de Microrelats a trauès deth hilat sociau Twitter. Entà participar cau que cada usatgèr d’aguesta plataforma seguisque eth compde dera Bibliotèca, e que ’piule’ un relat de 280 caràcters. Enguan, era tematica escuelhuda entath concors ei era musica, mès a d’èster un microrelat de creacion pròpria e que non age estat premiat en d’auti concorsi. Es ’piulades’ en aguest concors se pòden enviar enquiath pròplèu 19 de noveme. Eth/era guanhador/a aurà coma prèmi dues entrades entath concèrt de Gospel, organizat per Ajuntament, eth dia 7 de deseme, dues entrades tara pista de gèu deth Palai e dues entrades entara programacion annau culturau familiau der Ajuntament.
Ath delà, tanben se trape en marcha eth 2au Concors de fotografia “Eth Mèn repopet”, qu’amie a tèrme era Bibliotèca, amassa damb er Ajuntament e er airau de Pediatria der Espitau Val d’Aran. Entàs amants dera fotografia arribe una naua edicion d’aguest concors que preten mostrar era vida vidanta des repopets: ath torn deth leitatge maternau, es jòcs, es minjars, eth dromir... Es fotografies s’an d’enviar ara adreça electronica biblioteca@vielha-mijaran.org enquiath 19 de noveme. Eth/era guanhador/a aurà coma prèmi dues entrades entath concèrt de Gospel, organizat per Ajuntament, eth dia 7 de deseme, dues entrades tara pista de gèu deth Palai e dues entrades entara programacion annau culturau familiau der Ajuntament de Vielha e Mijaran.
Segontes era còsso de cultura de Vielha e Mijaran, Maria Vergés, “èm fòrça contenti de poder celebrar un nau aniversari d’aguest equipament municipau. Damb aguestes activitats pretenem aufrir ara gent diuèrses accions atractives, ath viatge que potenciam era preséncia der aranés en carrèr”.
25/10/2018