Notícies Veir istoric
Eth parcatge de caravanes e autocaravanes de Vielha a enregistrat mès de 150 pernoctacions pendent eth prumèr mes
Era installacion dauric eth 15 d’agost damb ua capacitat tà 36 places, e a recebut clients de fòrça païsi d’Euròpa
Eth parcatge de caravanes e autocaravanes plaçat en Mijaran a enregistrat mès de 150 pernoctacions a compdar dera sua dubertura eth passat 15 d’agost. En aguest prumèr mes, aguesta installacion a recebut clients de fòrça païsi d’Euròpa (francesi, belgues, alemans…) ath delà d’auer fòrça bona acuelhuda per part de clients catalans.
Aguest nau equipament compde damb servici de lavabos e de tractament des aigües residuaus des pròpries caravanes e autocaravanes. Totun, enes pròplèus mesi i aurà tanben servici de doches.
Es tarifes deth parcatge son: Parcatge (24 ores) + descarga/carga d’aigua WC (11€), Electricitat (3€), Descarga/carga aigua WC (3€), Wifi (Gratuït), parcatge de 10:00 a 19:00 (6€).
Segontes eth baile de Vielha e Mijaran, Juan Antonio Serrano, “èm satisfèts dera bona acuelhuda qu’a agut eth parcatge a compdar dera sua dubertura. Damb eth temps, de ben segur qu’arribarà a mès gent e i aurà fòrça mès pernoctacions, pr’amor qu’encara manquen per amiar a tèrme diuèrses melhores enes installacions”.
Eth parcatge de caravanes e autocaravanes de Mijaran place a Vielha e Mijaran coma municipi pionèr en aguest tipe d’installacions e que neishec en responsa ara normativa que non permet parcar e pernoctar ad aguesti veïculs en cap aute espaci municipau. Ath delà, eth parcatge s’a bastit sense qu’age supausat cap tipe de despena per part des vesins deth municipi.
26/09/2018