Notícies Veir istoric
S’inicien es trabalhs de conservacion dera Plaça dera Generalitat en Vielha
Dempús des aiguats de 2013, era plaça demorèc maumetuda, e damb aguesta intervencion se preten milhorar era seguretat en parcatge, en tot actuar entà favorir era estetica
A compdar d’aguesta setmana, er Ajuntament de Vielha e Mijaran a iniciat es trabalhs de melhora dera Plaça dera Generalitat en Vielha. Uns trabalhs que se demore que siguen prèsti pendent era tardor. Es òbres consistissen en apariar eth mur dera plaça a on se junhen es rius Garona e Nere, entà esvitar qu’er aigua pogue penetrar laguens deth parcatge dera plaça. En aguest sens, se lhèue eth mur ara nautada dera plaça, e tanben se procedís ara installacion de tanques metalliques entà melhorar era seguretat dera plaça en parcatge e hèr-la mès polida. Ath delà, tanben s’amie a tèrme era substitucion der enlumenat dera plaça, entà milhorar-ne era estetica.
Aguesti trabalhs s’emmarquen laguens dera 2au modificacion deth pressupòst municipau d’enguan, que compde damb ua partida de 97.341,24€. “Era intervencion ena conservacion deth parcatge dera Plaça dera Generalitat ère fòrça de besonh, pr’amor que dempús des aiguats de 2013 e damb es pujades deth cabau des rius Nere e Garona, era seguretat des parcatges calie milhorar-la”, comente eth baile de Vielha e Mijaran, Juan Antonio Serrano. E higís, qu’”autant eth parcatge exterior coma er interior, an patit filtracions d’aigua, e damb aguesta accion non tornaràn a patir inundacions”.
15/09/2018