Notícies Veir istoric
Eth baile de Vielha e Mijaran, Juan Antonio Serrano, s’amasse damb eth nau sosdelegat deth Govèrn en Lleida, José Crespín
Serrano a transmetut eth besonh de poder auer amassades damb eth Ministerio de Fomento pera reforma dera N-230 e damb eth Consejo Superior de Deportes peth futur deth Palai de Gèu de Vielha
Aguest deluns, eth baile de Vielha e Mijaran, Juan Antonio Serrano, s’a amassat damb eth nau sosdelegat deth Govèrn en Lleida, José Crespín. En aguesta reünion, Serrano a volut dar era benvenguda a Crespín en sòn nau cargue e an tractat desparièrs ahèrs de fòrça importància entà Vielha e Mijaran.
En aguest sens, Serrano a demanat a Crespín ua amassada urgenta damb eth Ministèri de Foment entà parlar sus eth futur dera N-230, principau èish vertebrador de Vielha e Mijaran e pòrta d’entrada e gessuda dera Val d’Aran damb era rèsta d’Espanha. Ena amassada, an podut parlar sus es allegacions que s’an presentat des deth territòri e eth besonh de poder començar a trapar era solucion avienta ath futur d’aguesta via.
Ath delà, an podut parlar sus eth futur deth Palai de Gèu de Vielha. Ara madeish era installacion a barrat indefinidament era pista de gèu, e encara se trapen en tot negociar eth futur dera gestion deth conjunt d’aguest equipament. En aguest sens, Serrano, a incidit en auer ua amassada damb eth Consejo Superior de Deportes.
Per un aute costat, tanben s’an referit ara problematica sus es examens de condusir. Ja hè diuèrsi mesi que Vielha non pòt realizar aguesti examens per manca de personau, e toti es interessadi en auer eth carnet de condusir an d’anar tà La Pobla de Segur entà obtier-lo. Per tant, an convengut en besonh de que Vielha pogue tornar a realizar aguesti examens coma ère de costum enquia hè uns mesi.
Segontes eth baile de Vielha e Mijaran, Juan Antonio Serrano, “des der Ajuntament auem volut dar era benvenguda ath nau sosdelegat deth Govèrn en Lleida, en tot poder tractar ahèrs que son fòrça de besonh entath municipi coma son era reforma dera N-230 e eth Palai de Gèu”. En aguest sens, Serrano hig qu’”a estat ua amassada fòrça profitosa entà andues parts e demoram qu’enes pròplèus mesi pogam auançar damb es demanes qu’auem transmetut”.
24/07/2018