Notícies Veir istoric
Comencen es òbres d’urbanizacion e melhora dera Plaça d’Aran de Vielha
Es trabalhs responen ar acòrd signat en 1992 entre er Ajuntament de Vielha e Mijaran e Conselh Generau d’Aran peth quau eth consistòri cedic a perpetoïtat er edifici de Çò de Saforcada e era maxima institucion assomie era urbanizacion dera Pla
Pendent aguesta setmana s’an iniciat es òbres d’urbanizacion dera Plaça d’Aran (entre era Sala Polivalenta e eth Conselh Generau d’Aran). Aguesti trabalhs, que s’amiaràn a tèrme pendent tot er ostiu, supausarà era remodelacion d’aguest endret gràcies ara collaboracion entre es administracions der Ajuntament de Vielha e Mijaran e eth Conselh Generau d’Aran.
Aguestes òbres se realizen en base ath convèni signat en an 1992, an de reinstauracion deth govèrn aranés, entre andues administracions entà urbanizar e melhorar aguest encastre. Damb aguest acòrd, er Ajuntament cedic a perpetuitat era antiga Casa Saforcada coma sedença administrativa tath Conselh, damb eth compromís de qu’era maxima institucion aranesa melhorèsse er estat d’aguesta plaça, en terren que va des dera pròpria sedença enquiara sala polivalenta.
Es trabalhs consistiran en engodronament deth solèr, en tot rebaishar eth nivèu dera plaça enquiara sala polivalenta, pr’amor qu’ara eth desnivèu ei important, era eliminacion des barrères arquitectoniques, atau coma era adequacion des servicis.
Er encastre dera Plaça d’Aran ei eth darrèr tram de tota aguesta parcèla, qu’ei de titolaritat municipau, que manque per adaptar e urbanizar. Pendent er an 2008 s’urbanizèc era part nauta d’aguesta plaça.
Segontes eth baile de Vielha e Mijaran, Juan Antonio Serrano, “dempús de fòrça ans, enguan veiram urbanizada era Plaça d’Aran. Ei un compromís qu’en sòn moment pactèrem er Ajuntament de Vielha e Mijaran damb eth Conselh Generau d’Aran, e fin finau, aguest ostiu serà ua realitat” e higie que “er equip de govèrn der Ajuntament ei fòrça satisfèt de veir que, mès enlà des discordàncies politiques, es diuèrses institucions podem trabalhar amassa entà melhorar eth nòste municipi e dignificar un lòc tant important entath país coma er entorn dera sedença dera maxima institucion aranesa”.