Notícies Veir istoric
Er Ajuntament de Vielha e Mijaran impulse eth Conselh dera Vila coma maxim òrgan de participacion ciutadana
Aguest òrgan, qu’ei contemplat ena ordenança de participacion ciutadana, hège ans que non s’amassaue e se torne a recuperar entà implicar ara societat enes ahèrs collectius
Er Ajuntament de Vielha e Mijaran a recuperat era figura deth Conselh dera Vila, un òrgan consultiu de participacion ciutadana non vinculant que hège ans que non s’amassaue, e que contemple era ordenança de participacion ciutadana, damb era implicacion des associacions e institucions sociaus, economiques, culturaus e esportives deth municipi, atau coma representants designadi pes partits politics.
Er objectiu d’aguest Conselh dera Vila ei poder amassar es opinions dera societat de Vielha e Mijaran entà qu’eth consistòri pogue conéisher quini son es ahèrs que mès preocupen ara ciutadania e quini son es sòns besonhs, en tot mostrar damb aguesta participacion ciutadana valors coma era transparéncia, e mantier un vincle dirècte damb era societat en tot fomentar era sua implicacion enes ahèrs collectius.
En aguest sens, aguest dijaus a agut lòc era prumèra amassada d’aguest Conselh dera Vila ena sedença der Ajuntament de Vielha e Mijaran damb un gran èxit de participacion des sectors sociaus deth municipi. Aguest Conselh s’amassarà de forma periodica.
Segontes era dusau tinent d’alcalde de Vielha e Mijaran, Maria Vergés, “des der Ajuntament volem qu’aguest Conselh dera Vila sigue er òrgan que permete ua interaccion dirècta entre eth consistòri e era societat a trauès des representants sociaus deth municipi”. Vergés tanben higie “era transparéncia ei un des valors que definissen eth govèrn municipau, e volem qu’aguest Conselh supause era manèra eficaça de poder escambiar informacion, opinions e suggeriments entre es diuèrsi sectors sociaus, en tot fomentar era participacion e consulta municipau des tèmes globaus e d’especiau transcendéncia entath municipi”.
14/07/2018