Notícies Veir istoric
Er Ajuntament de Vielha e Mijaran e era Òbra Sociau La Caixa signen un nau convèni tà destinar 15.000€ ar equipament deth nau Centre de Joenessa deth municipi
Era naua installacion entara joenessa compdarà damb tres espacis: ua zona de léser, ua de trabalh e ua d’activitats dirigides
Er Ajuntament de Vielha e Mijaran a signat un nau convèni de collaboracion damb era Òbra Sociau La Caixa entà contunhar damb eth bastiment dera naua installacion dirigida ara joenessa deth municipi, eth Centre de Joenessa de Vielha e Mijaran. En aguest convèni, era entitat privada destinarà 15.000€ entar aqueriment des equipaments que son de besonh entà deishar prèst aguest centre, que veirà era lum enguan. Eth Centre de Joenessa de Vielha e Mijaran compdarà damb tres tres espacis: ua zona de léser, ua de trabalh e ua d’activitats dirigides, que compdarà damb equipaments multimedia.
Aguesta aportacion se hig as 15.000€ qu’era Òbra Sociau La Caixa ja aportèc er an passat entà començar damb eth projècte de bastiment dera sala e er aqueriment de mobiliari. Aguest convèni a estat signat peth baile der Ajuntament de Vielha e Mijaran, Juan Antonio Serrano, eth director territoriau de CaixaBank en Catalonha, Jaume Masana e eth director d’Institucions de CaixaBank en Catalonha, Joaquim Macià.
Segontes eth baile de Vielha e Mijaran, Juan Antonio Serrano, “èm satisfèts damb aguest nau convèni damb era Òbra Sociau La Caixa, a qui arregraïm era sua collaboracion, pr’amor que mos permet auançar damb pas fèrm ena dubertura deth Centre de Joenessa de Vielha e Mijaran, qu’ei de besonh entàs joeni deth nòste municipi, e que ben lèu serà ua realitat”.
Eth Centre de Joenessa de Vielha e Mijaran serà plaçat ena bastissa der antic aucider de Vielha, en carrèr Arnals.