Notícies Veir istoric
Vielha e Mijaran acuelh eth pròplèu 14 de junhsèga era 2au Trail Vielha-Molières 3010 damb 1200 participaires
Damb aguesta pròva se da contunhitat as eveniments esportius en municipi, a on i aurà ua repercusion economica de mès de 300.000€ apuprètz, en benefici deth sector toristic
Aguest pròplèu dissabte, 14 de junhsèga, Vielha e Mijaran acuelh era celebracion dera 2au edicion dera Trail Vielha-Molières 3010, ua competicion de nauta montanha que supausèc un gran impacte er an passat ena sua estrea damb mès de 700 corredors, e qu’enguan tornarà a supausar un exit de participacion. Fin finau, lèu 1200 participaires preneràn part d’aguesta pròva que se demore que pogue assolidar-se coma ua des competicions de trail-running mès importantes dera Val d’Aran.
Era pròva aurà 3 modalitats: Era Molières Maraton de 42 kms, damb 545 participaires, era Montpius Skyrace 23, damb 453 inscrits, e era Tuca Trail, d’11 kms, damb 190 corredors. Cau remercar qu’ath delà d’auer participaires que vieràn de tota Espanha, tanben preneràn part dera pròva corredors de diuèrsi païsi d’Euròpa coma França, Belgica, Suècia o Ucraïna entre d’auti, de manèra qu’en sonque dues edicions, s’artenh qu’era corsa comence a auer repercusion internacionau.
Entath sector toristic de Vielha e Mijaran serà ua dimenjada fòrça bona, en tant que damb es lèu 5000 sojorns que se demoren, eth sector ostalèr se’n veirà beneficiat. Era repercusion economica serà fòrça bona, damb uns 300.000€ d’ingrèssi apuprètz, de manèra que tot eth sector servicis trabalharà a plen rendiment.
Segontes eth còsso d’Espòrts de Vielha e Mijaran, Alberto López, “Era Trail Vielha-Molières 3010, en sonque dus ans de vida, ja camine damb pas fèrm entà èster un eveniment esportiu de referéncia de montanha non sonque en nòste municipi senon en conjunt des Pirenèus entàs pròplèu ans”. López hig, que “des dera organizacion, en collaboracion damb er ajuntament, s’a hèt un gran trabalh entà plaçar Vielha e Mijaran precisament coma referent esportiu, e pendent tot er ostiu, damb pròves com aguesta, artenharam ua gran repercusion economica e mediatica en benefici deth conjunt deth municipi”.