Notícies Veir istoric
Er Ajuntament de Vielha e Mijaran amie a tèrme era neteja e manteniment des dipòsits d’aigua municipaus
Eth govèrn municipau invertís mès de 70.000€ en aguesti trebalhs, en tant que diuèrsi dipòsits hè mès de 15 ans que non s’auien netejat ne desinfectat e calie reformar es cloradors
Pendent aguest ostiu, er Ajuntament de Vielha e Mijaran se trape en tot desvolopar trebalhs de neteja e manteniment des dipòsits d’aigua municipaus. Uns trebalhs que son de besonh, en tant que diuèrsi pòbles deth municipi an un o mès dipòsits, e fòrça d’eri hè mès de 15 ans que non s’auien desinfectat.
Entà amiar a tèrme aguesti trebalhs enes dipòsits, er Ajuntament de Vielha e Mijaran a contractat a ua enterpresa especializada, pr’amor qu’era normativa obligue a que sigue ua enterpresa extèrna qui realize aguesta neteja e desinfeccion. Es trebalhs consistissen en uedar es dipòsits entà poder cercar se i a bèth tipe d’incidéncia, sustot damb era possibla aparicion de bacteries, e dempús era enterpresa elabòre er informe avient sus er estat deth dipòsit. Entà non deishar ara poblacion sense aigua mentre se realizen es inspeccions, s’amien a tèrme diuèrsi bypass pendent 24 ores, entà poder aufrir eth servici damb normalitat. A dia d’aué, bona part des dipòsits ja son enes condicions avientes entà contunhar damb era sua foncion respècte as ciutadans.
Des der ajuntament, era intencion ei qu’aguest manteniment des dipòsits municipaus sigue ua accion que se pogue desvolopar cada dus ans, entà poder auer-les enes melhores condicions e controtlar periodicament se se produsís bèth tipe d’anomalia. Ath delà, en tota aguesta intervencion, tanben s’amie a tèrme ua reforma des cloradors. En totau, en aguesta actuacion, eth govèrn municipau invertís mès de 70.000€ aprovadi ena 2au modificacion de credit d’enguan.
Segontes eth còsso d’Infrastructures, Òbres e Servicis de Vielha e Mijaran, Jacint Cuny, “aguesta intervencion enes dipòsits d’aigua deth municipi ère de besonh, pr’amor que fòrça d’eri hè mès de 15 ans que non s’auien netejat. En aguest sens, era salut des nòsti vesins ei çò que mos cau preservar, e per aguest motiu amiam a tèrme es trebalhs de manteniment d’aguesti equipaments”. Ath delà, Cuny hig que “cau tier en compde qu’es dipòsits an cloro, e açò favorís eth deteriorament des sues foncions abituaus. Per tant, auiem d’actuar urgentament en aguest airau”.
Aguesti trebalhs enes dipòsits d’aigua municipaus finalizaràn pendent era pròplèu setmana, quan ja toti es pòbles de Vielha e Mijaran dispausaràn d’aguesti equipaments enes condicions avientes.
29/06/2018