Notícies Veir istoric
Vielha e Mijaran inicie eth periòde de competicions esportives d’ostiu damb era 13au Pedals de Foc Non Stop damb gessuda e arribada en Vielha
Era pròva aurà un impacte economic d’uns 350.000€ pendent ua dimenjada, en benefici generau deth sector toristic deth municipi
Aguest
pròplèu 30 de junh se dispute ua naua edicion dera Pedals de Foc Non Stop,
era pròva de BTT per excelléncia d’Espanha e qu’a Vielha coma punt
de gessuda e d’arribada. Damb aguesta pròva, s’inície eth periòde
de competicions esportiues d’estiu en municipi que finalizarà eth
pròplèu mes d’octobre. Enguan era Pedals de Foc Non Stop a obtengut un recòrd de participaires, en tot barrar en 965
ciclistes eth periòde d’inscripcions. Grana notícia qu’assolide era
pròva coma ua des mès importantes d’Espanha e que cada viatge
artenh mès participaires. En aguesta edicion aurà ciclistes
arribadi de 11 païsi deth mon (Portugau, Mexic, Itàlia, França,
Colómbia, Bolívia, Soïssa, Espanha, Àustria, Gran Bretanha e
Dinamarca).
Ath marge des ciclistes tanben calerà
compdar damb eth gran nombre d’acompanhants que s’estime que sigue de 3.000 persones. D’aguesta manèra er
impacte economic qu’aurà era Pedals de Foc Non Stop en Vielha e Mijaran serà d’uns 350.000€, en benefici d’ua nauta
aucupacion otelèra e en generau deth conjunt deth sector servicis
deth municipi pendent er inici der estiu.
Ath delà, eth
hèt que Vielha compde damb un ample parcatge ena zòna des ancianes
casèrnes militares, facilite que se pogue plaçar ua grana carpa
entà aufrir toti es servicis de besonh entàs ciclistes, en favor
d’ua melhora qualitat e comoditat abans e dempús dera competicion.
Era nauetat mès importanta d’aguesta edicion ei era preséncia d’ua zòna de recuperacion muscular e massatge ena zòna d’arribada en Vielha. Coma en d’autes edicions, era Pedals de Foc Non Stop trauessarà pòrts importanti coma eth Coll de Triador o eth Coll d’Oli en tot completar 213 kms, damb 6200 mètres de desnivèu positiu.
Es campions dera edicion de 2017, Joseba Albizu e Sandra Jordà defeneràn es títols guanhadi deuant de grani ciclistes coma Llibert Mill (guanhador de cinc edicions), Brendan Márquez (guanhador de tres edicions) o Ramona Gabriel (guanhadora en 2016).
Segontes eth baile de Vielha e Mijaran, Juan Antonio Serrano, “era Pedals de Foc Non Stop ei ua des pròves esportives mès importantes qu’auem en Vielha e Mijaran, en tot plaçar Vielha coma lòc de gessuda e d’arribada. Supause ua grana notícia que ja celèbren era 13au edicion, pr’amor qu’er impacte economic qu’a en sector toristic deth nòste municipi ei fòrça important e demoram que pogue contunhar fòrça ans mès”.