Notícies Veir istoric
Er Ajuntament de Vielha e Mijaran demanarà ath Conselh Generau d’Aran era retirada immediata des ossi conflictius deuant des atacs patidi en municipi
Aguesta demana se hè dempús de que per prumèr viatge i a agut atacs a bestiar en Vielha e Mijaran, enes pòbles de Betlan e Montcorbau e a aumentat era preocupacion pera seguretat des vesins e des visitaires, atau coma des pròpris pagesi
Er Ajuntament de Vielha e Mijaran demanarà formaument ath Conselh Generau d’Aran que hèsque es accions de besonh entà amiar a tèrme era retirada immediata des ossi conflictius que provòquen es atacs ath bestiar. Era preocupacion en municipi de Vielha e Mijaran ei maximala, dempús de veir es darrèri atacs que s’an produsit pendent aguesta primauera, pr’amor qu’enguan ei eth prumèr viatge qu’es ossi an realizat atacs en Vielha e Mijaran. En mai i auec dus atacs en tèrme de Betlan damb era mòrt d’ua oelha e d’un anhèth e, aguesta setmana, ua cavala en Montcorbau.
Aguesti atacs an metut en alèrta ar ajuntament, que comence a preocupar-se pera inseguretat que i a ara madeish en municipi. D’un costat, aguesti atacs dificulten eth normau desvolopament dera activitat ramadèra, e per un aute costat, un des possibles efèctes negatius que pòt auer aguest aument considerable d’atacs des ossi, ei en sector toristic, principau motor economic deth municipi.
Segontes eth baile der Ajuntament de Vielha e Mijaran, Juan Antonio Serrano, “des der ajuntament èm fòrça preocupadi pera grana quantitat d’atacs d’ossi que s’an enregistrat aguesta primauera. Ei eth prumèr viatge que n’auem consciéncia en Vielha e Mijaran, damb es casi de Betlan e Montcorbau, e ei perilhós pr’amor que son apròp des pòbles e dera gent”. Serrano higís que ”toti aguesti atacs pòden auer ua repercusion negativa en torisme, principau sector economic de Vielha e Mijaran. Per açò, demanaram ath Conselh Generau d’Aran era sua retirada. Non volem méter en perilh era vida de cap vesin ne de cap persona que vengue de dehòra entàs nòstes montanhes. Ath delà, aguesti atacs hènt dificil eth trebalh des pagesi, que compden damb ues compensacions insufisentes e tardiues”.