Notícies Veir istoric
Er Ajuntament de Vielha e Mijaran abilite enes sedences electroniques er IdCat Mobil, un nau sistèma d’accès damb certificat digitau
Damb er IdCat Mobil, es ciutadans pòden enregistrar es sues donades de contacte ena sedença electronica sense auer de desplaçar-se a un burèu presenciau tà hèr tramits damb er ajuntament
A compdar d’aguesta primauera, er Ajuntament de Vielha e Mijaran a abilitat enes sedences electroniques autant dera pròpria institucion coma des Entitats Municipaus Descentralizades, un nau sistèma d’accès damb certificat digitau, nomentat IdCat Mobil. Se tracte d’un sistèma mès ràpid e mès senzill d’emplegar, damb eth quau se preten qu’es ciutadans poguen enregistrar es sues donades de contacte ena sedença electronica, sense auer de desplaçar-se a un burèu presenciau. D’aguesta manèra, s’artenh que sigue mès agila era realizacion de tramits damb er ajuntament.
Entà poder enregistrar-se en IdCat Mobil, ei de besonh visitar era plana web: https://idcatmobil.seu.cat/. Er IdCat Mobil permet identificar-se e signar des de quinsevolh mobil, tauleta e ordinador. D’aguesta manèra, non cau rebrembar cap contrassenha ne PIN. Non ei de besonh era installacion de cap tipe de programa informatic, ei un sistèma segur, non caduque damb eth temps e ei gratuït. S’auetz certificat digitau, entà enregistar-se sonque cau dispausar deth certificat digitau valid, correctament installat e eth mobil. Se non auetz eth certificat digitau, ei de besonh eth DNI e era Targeta Sanitària Individuau deth CatSalut e eth mobil.
Damb er IdCat Mobil, er Ajuntament de Vielha e Mijaran contunhe damb era transformacion digitau, en tot facilitar es tramits qu’es vesins agen de besonh de hèr damb era institucion.
Segontes eth còsso de Naues Tecnologies de Vielha e Mijaran, Alberto López, “er IdCat Mobil ei un sistèma nau que servís entà facilitar era vida des vesins deth municipi en toti aqueri tramits qu’agen de hèr damb er ajuntament. Abantes, entà hèr toti es tramits era gent auie de hèr fòrça viatges, ara redusim fòrça es tramits, e per tant, des de quinsevolh telefon mobil poiràn hèr es tramits e estauviar temps”. Ath delà, López higís, “des de der ajuntament animam a toti es vesins de Vielha e Mijaran a que s’enregistren en IdCat Mobil, pr’amor que veiràn coma lis cambiarà era vida damb un sistèma rapid e senzill”.