Notícies Veir istoric
Es pròplèu 16 e 17 de junh se dispute era 11au edicion deth Tornèg 30 Ores de Fotbòl Sala-Vila de Vielha
14 equipes dera Val d’Aran, Lleida e Barcelona participaràn en aguest campionat que se celebrarà en Palai d’Espòrts de Vielha
Eth Palai d’Espòrts de Vielha acuelherà aguesta pròplèu dimenjada, pendent es dies 16 e 17 de junh, ua naua edicion deth Tornèg 30 Ores de Fotbòl Sala-Vila de Vielha. Enguan aguest campionat artenh era 11au edicion, en tot consolidar-se coma un eveniment fixe en calendari esportiu de Vielha e Mijaran ena primauera.
Ar acte de presentacion que s’a amiat a tèrme ena Sala de Plens der Ajuntament de Vielha e Mijaran, i an assistit diuèrsi membres dera Associacion Esportiua Fotbòl d’Aran (Santi Gimeno, Fabian Arroyo, Quim Calbetó, Sergi Llauradó e Jose Manuel Badia), organizadors deth campionat, amassa damb eth baile de Vielha e Mijaran, Juan Antonio Serrano, e eth còsso d’Espòrts, Alberto López.
Eth campionat compdarà damb un totau de 14 equipes: 9 dera Val d’Aran, 3 de Lleida, 1 de Vilanova i la Geltrú e 1 de Sitges. Eth format ei de 3 grops (2 de 5 equipes e 1 de 4), a on se classificaràn 8 equipes entara següenta fasa: 4 de manera dirècta e es autes 4 places se les disputaràn era rèsta d’equipes.
En çò que tanh as prèmis, es guanhadors s’emportàran 2000€ e es finalistes, 750€. Tanben i aurà prèmis entath Màger Golejador, Melhor Portèr e Jogador Mès Avalorat. Per un aute costat, cada equipa que participe receberà ua samarreta commemorativa entà cada jogador e se convidarà a un dinar o sopar a toti es participants deth tornèig.
Segontes eth baile de Vielha e Mijaran, Juan Antonio Serrano, “èm fòrça erosi de poder collaborar en un campionat com aguest, en que se met en valor er espòrt en Vielha e Mijaran, e sustot, que favorís que esportistes de dehòra poguen vier cada an entath nòste municipi e gaudir d’ua dimenjada damb es nòsti joeni en un gran ambient en Palai d’Espòrts de Vielha”.