Notícies Veir istoric
Er Ajuntament de Vielha e Mijaran aufrís dus naui productes de Marcha Nordica en junh, deuant deth gran exit de participacion des darrèri dus ans
Eth Vielha Sportive Nòrdic Walking s’amiarà a tèrme es dimars e eth Vielha Healthy Nòrdic Walking toti es deluns e dijaus
A compdar d’aguest mes de junh, er Ajuntament de Vielha e Mijaran met a disposicion des ciutadans un totau de 3 productes de Marcha Nordica dempús de veir eth gran exit de participacion que i a agut pendent es darrèri dus ans. Enquiara, i auie eth Vielha Social Nòrdic Walking que s’amie a tèrme toti es dissabtes. Cadua d’aguestes gessudes supause completar recorreguts per desparières endrets de Vielha e Mijaran, apuprètz de 3 ores de durada e entre 8 e 11 kms.
Ara, s’amplie eth projècte damb dus naui productes: D’un costat, eth Vielha Sportive Nòrdic Walking, qu’aurà lòc cada dimars e que supausarà gessudes entà completar recorreguts en menor temps possible. Er orari serà entre es 18:00 e es 20:30. E, per un aute costat, eth Vielha Healthy Nòrdic Walking, que s’amiarà a tèrme es deluns e dijaus, en tot començar aguest pròplèu 4 de junh. En aguest cas, es gessudes van dirigides a toti aqueri ciutadans que son en baisha forma o qu’es mètges lis an aconselhat activitat fisica per presentar factors de risc o diuèrses patologies. Seràn gessudes sense guaire desnivèu, damb recorreguts de 4-5 kms e a un ritme suau.
Segontes eth còsso d’Espòrts de Vielha e Mijaran, Alberto López, “ei ua grana notícia eth hèt de poder presentar naui productes de Marcha Nordica en municipi. Era responsa dera gent en aguesti ans a estat fòrça importanta, en tot fomentar era practica d’aguesta modalitat esportiva que cada viatge artenh mès participacion”. López higís qu’”era gent vò naui rèptes en foncion dera sua condicion fisica, e ei eth moment d’aufrir diuèrses modalitats de Marcha Nordica segontes es possibilitats de cadun, en tot implementar mès dies pendent era setmana”.
En 2016 i auec un totau de 21 gessudes damb ua miejana de 9 participaires per gessuda, e en 2017 s’amplièc a 32 gessudes, damb un increment dera miejana a 14 participaires, entre es sasons de primauera e era tardor.
02/06/2018