Notícies Veir istoric
Era Escòla Garona a acuelhut ua jornada de dinamiques de grop entà auançar ena elaboracion deth Plan Locau de Joenessa
Diuèrses associacions trabalhèren damb tecnics de joenessa dera Generalitat entà conéisher es inquietuds e besonhs des joeni de Vielha e Mijaran
En tot auançar damb era elaboracion deth Plan Locau de Joenessa, era Escòla Garona a acuelhut ua jornada de dinamiques de grop damb diuèrses associacions de Vielha e Mijaran. En aguest sens, i a agut joeni representants deth Club d’Espòrts de Gèu Val d’Aran (CEGVA), dera Associacion Esportiva der INS d’Aran e deth Centre Juvenil i Esplai Aran-Thal. Un totau de lèu vint persones, qu’an trabalhat damb tecnics de joenessa dera coordinacion territoriau de Lhèida e era tecnica dera Oficina de Joenessa, Estefania Revilla, en tot conéisher quini son es besonhs qu’an es mès joeni e poder aufrir un Plan Locau de Joenessa que contemple ua aufèrta d’accions ara nautada des sues inquietuds.
Eth Plan Locau de Joenessa serà prèst pendent aguest ostiu e serà vigent enquiath pròplèu an 2021. Eth plan partís d’un convèni qu’er ajuntament a signat damb eth Conselh Generau d’Aran, en quau compartiràn era figura dera tecnica de joenessa entà amiar-lo a tèrme. Eth plan contemplarà tanben es criteris de gestion deth Centre Joen Vielha, que se demore que pogue èster ua realitat a compdar de finaus d’aguest an.
Segontes eth còsso de Joenessa de Vielha e Mijaran, Alberto López, “ei fòrça important conéisher qué vòlen es joeni, coma viuen, quini besonhs an, entà qu’aguest Plan Locau de Joenessa se lo hèsquen sòn. Aguestes jornades de dinamiques de grop cèrque apropar precisament er Ajuntament as joeni, tà que poguen collaborar damb nosati ena elaboracion des linhes estrategiques d’actuacion, e en definitiva, que poguen ajudar a definir eth sòn futur”.