Notícies Veir istoric
Er Ajuntament de Vielha e Mijaran s’amasse damb es responsables des sectors educatius deth municipi entà tractar sus eth Plan d’Igualtat de Genre
Era amassada de trabalh a abordat era tematica dera igualtat entre òmes e hemnes en encastre educatiu e coma era escòla e era familha pòden ajudar ara conscienciacion des mès joeni e deth sòn entorn
Aguest dimars, er Ajuntament de Vielha e Mijaran s’a amassat damb es desparières equipes directives des sectors educatius municipaus entà tractar eth contengut deth Plan d’Igualtat de Genre que premanís eth consistòri. Ena amassada i an estat present representants autant dera Escòla Garona, era Escòla Mairau “Era Cunhèra” de Vielha, e des Servicis Educatius dera Val d’Aran. Pendent era amassada s’a tractat sus era realitat des centres educatius deth municipi ath torn d’aguest ahèr e es professionaus an presentat prepauses practiques que se pòden amiar a tèrme a trauès d’aguest Plan.
Er Ajuntament de Vielha e Mijaran elabòre eth Plan d’Igualtat de Genre entà que servisque tà definir es politiques qu’an de potenciar era igualtat d’oportunitats en municipi. Eth Plan aurà ua vigéncia de quate ans.
Segontes era còsso d’Accion Sociau de Vielha e Mijaran, Maria Vergés: “Eth sector educatiu ei clau ara ora de trabalhar ena conscienciacion des mès joeni e des sues familhes deuant dera igualtat entre òmes e hemnes” e higie que “era administracion a de dedicar esfòrci e recorsi ad aguest ahèr qu’ei de vitau importància entà arténher ua societat justa e igualitària”.
Aguest dimars, tanben i auec ua amassada damb eth personau intèrn der Ajuntament de Vielha e Mijaran entà parlar sus eth Plan d’Igualtat de Genre e poder conéisher eth sòn posicionament.