Notícies Veir istoric
Er ajuntament de Vielha e Mijaran signe un convèni damb eth Col·legi de Veterinaris de Catalunya entà aderir-se ar AIAC
Damb aguest archiu, se poderà identificar, localizar e controtlar es animaus de companhia que i age en municipi
A compdar d’aguesta primauera, er ajuntament de Vielha e Mijaran s’aderís ar AIAC (Archiu d’Identificacion d’Animaus de Companhia), eth servici damb eth qu’eth Col·legi de Veterinaris de Catalunya s’aufrís as ciutadans qu’an animaus de companhia, damb era intervencion dirècta des veterinaris, e que permet localizar-les quan es sòns animaus, degudament identificadi, son trapadi.
Damb aguesta adhesión ar AIAC, i aurà ua melhor gestion per part der ajuntament de Vielha e Mijaran deth cens municipau d’animaus de companhia. En aguest sens, se li facilitarà er accès ara basa de donades deth cens d’animaus de companhia qu’a precisament er AIAC, a on son enregistrades es donades d’identificacion des animaus de companhia de manera abituau en municipi, e es donades des sòns proprietaris.
Er ajuntament de Vielha e Mijaran mòstre era sua sensibilizacion vers a un ahèr tanplan delicat coma ei eth tracte respècte as animaus de companhia. D’aguesta manèra, era institucion vò trebalhar directament damb es proprietaris e damb es associacions d’animaus en cas que i age era notificacion dera pèrta de bèth animau o se’n pogue trapar bèth un sense saber qui ei eth sòn proprietari. Atau madeish, será ua mesura mès entà sensibilizar ara poblacion sus era importància d’auer ben identificadi as sòns animaus, atau coma es sòns comportaments, coma pòt èster es sues defecacions.
Segontes eth còsso d’Espòrts, Joenessa e Naues Tecnologies de Vielha e Mijaran, Alberto López: “Des der ajuntament mos aderim a ua campanha fòrça important que s’amie a tèrme des de Catalonha sus era identificacion des animaus de companhia, en tant qu’èm conscienti deth besonh d’auer-les localizadi e controtladi. Ath delà, mos permet poder collaborar estretament damb es proprietaris e es associacions d’animaus que i a ena Val d’Aran”.
18/05/2018