Notícies Veir istoric
Era Escòla Mairau “Era Cunhèra” de Vielha celèbre eth Dia Internacionau des Famílies damb ua hèsta ena sala polivalenta
Ei eth 3au an que se celèbre aguesta hèsta en Vielha e Mijaran, en tot auer-i un vrespalh saludable e animacion infantila damb eth grop “Caña de Sucre”
Pendent aguesta tarde era escòla mairau “Era Cunhèra” de Vielha a celebrat eth Dia Internacionau des Famílies damb ua hèsta ena sala polivalenta. Ua hèsta qu’a compdat damb era participacion des pairs e mairs des alumnes mès petiti deth municipi de Vielha e Mijaran que son ena escòla, e qu’enguan supausen 68 alumnes, ena que i a agut un vrespalh saludable damb fruta e era actuacion deth grop d’animacion infantila “Caña de Sucre”.
Aguest ei eth 3au an que s’amie a tèrme aguest eveniment en Vielha. Enes ans anteriors era hèsta s’auie hèt en Aran Park e ena madeisha Escòla Mairau respectivaments. Enguan, era idèa iniciau ère hèr era hèsta ena Boca Sud deth Tunèl de Vielha, mès es condicions climatologiques advèrses an obligat a desvolopar era hèsta ena sala polivalenta.
Segontes era còsso d’Ensenhament e Cultura de Vielha e Mijaran, Maria Vergés:”Èm fòrça satisfèts pera implicacion qu’an es pairs e mairs des alumnes dera escòla mairau damb aguesta hèsta, en tot just 3 ans que hè que s’amie a tèrme. Ues jornades que servissen entà fomentar era bona relacion entre es petiti e es adults damb activitats que son pensades entà refortilhar era convivéncia entre toti”.
16/05/2018