Notícies Veir istoric
Er ajuntament de Vielha e Mijaran trebalhe ena elaboracion deth Plan Locau de Joenessa (2018-2021) que serà prèst aguest ostiu
Per prumèr viatge Vielha e Mijaran aurà un Plan Locau de Joenessa
Er ajuntament de Vielha e Mijaran a començat a elaborar eth Plan Locau de Joenessa (2018-2021) pendent aguesta primauera, e se demore que sigue prèst aguest madeish ostiu. Aguest plan supausarà era huelha de rota entad aguest sector dera societat enquiar an 2021. Ei eth prumèr viatge que Vielha e Mijaran dispausarà d’un Plan d’aguest tipe en municipi.
Eth Plan Locau de Joenessa partís d’un convèni qu’er ajuntament a signat damb eth Conselh Generau d’Aran, en quau compartiràn era figura d’ua tecnica de joenessa entà amiar-lo a tèrme. Era prumèra fasa d’aguest plan consistís en elaborar ua analisi der estat actuau dera joenessa en municipi. En aguest sens, ei important poder conéisher quina ei era aufèrta qu’a eth sector aué dia, quines son es associacions restacades damb es joeni, en tot crear dinamiques de grop (focus groups) entà poder amassar es inquietuds des joeni e trebalhar en tot çò qu’an de besonh.
Ath delà, er ajuntament meterà en foncionament un seguit d’enquèstes damb gent qu’abituauments trebalhe ath tor des joeni (tecnics esportius, mèstres…), pr’amor que coneishen es aspiracions e besonhs reaus des joeni e pòden aportar informacion de gran interès entara elaboracion deth plan. Damb tot açò, se poderàn establir es diuèrses linhes d’actuacion qu’aurà d’auer eth Plan Locau de Joenessa.
Eth plan contemplarà tanben es criteris de gestion deth Centre Joen Vielha, que se demore que pogue èster ua realitat a compdar de finaus d’aguest an.
Segontes eth còsso d’Espòrts, Joenessa e Naues Tecnologies, Alberto López: “Aguest Plan Locau de Joenessa ei fòrça important entath municipi de Vielha e Mijaran, entant qu’ei de besonh aufrir as nòsti joeni totes es oportunitats que meriten. Entad açò, mos cau conéisher es sues inquietuds e demandes, e potenciar es accions que melhor concòrden damb çò qu’an de besonh. Ei important que siguen conscienti qu’eri pòden collaborar damb er ajuntament e participar enes ahèrs que les preocupen. Ath delà, ei era milhor forma qu’auem de fomentar valors claus coma era cooperacion e er associacionisme”.