Notícies Veir istoric
Aguest pròplèu 20 de mai, Vielha celèbre era Hèsta de Santa Quitèria
Ath delà deth tradicionau esdejoar e era missa, er ajuntament de Vielha e Mijaran organize un dinar popular e ua session de balh e animacion infantila pera tarde
Aguest pròplèu dimenge, Vielha torne a celebrar era tradicionau Hèsta de Santa Quitèria en parçan der Espitau de Vielha (Boca Sud deth Tunèl) damb un seguit d’activitats dubèrtes autant tàs aranesi, coma entàs visitaires des comarques vesies.
Entàs 10:00, er ajuntament de Vielha e Mijaran organize eth tradicionau esdejoar deuant dera capèla de Santa Quitèria. Entàs 12:00, contunharàn es actes damb era missa en aunor a Santa Quitèria e, en auer acabat, s’amiarà a tèrme era benediccion des tèrmes e eth repartiment dera Caritat. Ara seguida, i aurà diversion damb era charanga e animacion infantila.
Tath tor des 14:00, aurà lòc eth dinar popular organizat per ajuntament. Ua iniciativa que hè dus ans qu’ei en foncionament e qu’aurà un prètz de 15€ entàs adults e 8€ eth menú infantil. Es tiquets son ara venda en ajuntament de Vielha e Mijaran e en AMPA. E, entà finalizar era hèsta, a compdar des 16:00 i aurà session de balh e animacion infantila.
Entà toti aqueri que volguen anar tà Santa Quitèria sense coche, era enterpresa ALSA met ara sua disposicion eth servici gratuït de transpòrt damb autobús. Es oraris son: Gessuda des de Vielha entàs 10:00 e entàs 11:00, e des dera Boca Sud entàs 18:00 e entàs 19:00.
15/05/2018