Notícies Veir istoric
Finalize damb exit era 2au edicion deth hestivau Black Mountain Bossòst ena que Vielha a participat damb diuèrses activitats
Fòrça gent presencièc es pellicules projectades ena Sala Era Audiovisuau e eth Parador de Torisme de Vielha aufric ua serada literària damb eth liurament de diuèrsi prèmis
Era 2au edicion deth Black Mountain Bossòst, dedicat eth genre nere, finalizèc aguest dimèrcles damb ua nauta participacion de gent enes diuèrses activitats organizades. Vielha enguan se higie ad aguest hestivau, en tot acuélher era projeccion de 3 pellicules deth director francés, Jean Pierre Melville, pendent eth 28, 29 e 30 d’abriu. Era sala s’aumplic entà veir “Hasta el último aliento” (1966), “El silencio de un hombre” (1967) e “El círculo rojo” (1970).
Ath delà, er 1 de mai, eth Parador Nacionau de Torisme de Vielha acuelhèc ua serada literària ena que se liurèren diuèrsi prèmis laguens deth hestivau. Per un costat, eth Prèmi Black Mountain Bossòst siguec autrejat a Juan Madrid, per ua longa trajectòria laguens deth genre nere. Eth premiat confirmèc qu’ena Val d’Aran a començat a escríuer era sua següenta novèla e que demore presentar-la ena pròplèu edicion deth hestivau.
Per un aute costat, Agustín Martínez damb era òbra “La mala hierba” guanhèc eth prèmi ara melhor novèla nera en castelhan de 2017. José Maria Garcia damb “Tráfico” e José Ramon Gómez damb “Ojos que no ven”, sigueren distinguidi damb eth prèmi La Orilla Negra. Mentre que Dani Marín, alumne der INS d’Aran, guanhèc eth prèmi Montanha Nera Bossòst ath melhor relat nere damb “El asesinato de Susan”.
En totau sigueren 5 dies de literatura entre Bossòst, Vielha e Toulouse, enes qu’era gent dera Val d’Aran compdèc damb fòrça activitats enes que preneren part fòrça escrivans espanhòls: conferéncies, taules redones, projeccions, presentacion de libres e fòrça mès activitats restacades damb eth genre nere.
Segontes era còsso d’Ensenhament e Cultura de Vielha e Mijaran, Maria Vergés: “Aguesta 2au edicion deth Black Mountain Bossòst a estat un exit, e enguan damb era participacion de Vielha e Mijaran, eth hestivau comence a préner mès importància, e demoram qu’enes pròplèus edicions pogue contunhar en tot apropar eth genre nere e era literatura a tota era ciutadania dera Val d’Aran”.
03/05/2018