Notícies Veir istoric
Er Ajuntament de Vielha e Mijaran e era Bibliotèca Generau de Vielha an premanit un ample programa d’activitats entà Sant Jòrdi
Es activitats comencen aguesta setmana e s’estenen enquiar 11 de mai
Pendent aguesta setmana comencen es activitats entà celebrar eth Dia deth Libre damb motiu dera hèsta de Sant Jòrdi qu’an premanit er Ajuntament de Vielha e Mijaran damb era Bibliotèca Generau de Vielha, damb era collaboracion deth Conselh Generau d’Aran.
Eth 19 d’abriu entàs 17:30, laguens dera activitat Libres entà créisher damb era Doctora Imma Caubet, se parlarà deth libre “Els braços que no malcrien”. Eth 21 entàs 17:00, s’amiarà a tèrme eth Conda Condes, damb Blai e es sòns “Contes a cabassos”. Ara seguida, se presentarà eth conde encadeat que resultarà deth concors de Twitter qu’a estat en foncionament en abriu e que finalize eth 19. Atau madeish, eth 23, dia de Sant Jòrdi, se realizarà un talhèr manuau entàs 17:30 entà celebrar aguesta jornada e començarà eth cicle de visites escolares ara Bibliotèca que durarà enquiath 27. Ath delà, cau remercar que tanben se pòden visitar un parelh d’exposicions enquiath pròplèu 11 de mai, qu’amien per nòm “S’ha escrit un crim” e “Un disparo al autor”, en orari abituau dera Bibliotèca.
Segontes era còsso d’Ensenhament e Cultura de Vielha e Mijaran, Maria Vergés: “Sant Jòrdi ei ua hèsta fòrça demorada per toti, e des der Ajuntament, amassa damb era Bibliotèca, auem premanit un conjunt d’activitats entà tota era familha, en tot méter en valor era cultura, en aguest cas era literatura, tà commemorar eth Dia deth Libre”.
Totes es activitats son gratuïtes e s’amiaràn a tèrme enes installacions dera Bibliotèca Generau de Vielha.
18/04/2018