Notícies Veir istoric
Vielha s’ahig ara 2au edicion deth hestivau Black Mountain Bossòst, a on i participe damb diuèrses activitats
Eth hestivau de genre nere aurà lòc pendent eth 28 d’abriu e eth 2 de mai, e Vielha acuelherà era projeccion de diuèrses pellicules e prèmis que se liuraràn enes installacions deth Parador de Torisme
Vielha participarà enguan ena 2au edicion deth hestivau Black Mountain Bossòst (Montanha Nera Bossòst) qu’aurà lòc pendent eth 28 d’abriu e eth 2 de mai. Enguan se produsís ua expansion importanta d’aguest hestivau de genre nere ena Val d’Aran, entant qu’ath delà de Bossòst, Vielha e Toulouse tanben i participen actiuaments. En aguest sens, era sala Era Audiovisuau de Vielha acuelherà era projeccion de 3 pellicules deth director francés, Jean Pierre Melville, pendent es dies 28, 29 e 30 d’abriu. Ath delà, eth 29 d’abriu aurà lòc ua grana serada en Parador de Torisme de Vielha, damb eth liurament de diuèrsi prèmis literaris e de reconeishença a diuèrsi escrivans.
Segontes era còsso d’Ensenhament e Cultura de Vielha e Mijaran, Maria Vergés:”Èm tanplan erosi de que Vielha pogue acuélher e participar en un hestivau literari com aguest, en que se met en valor era cultura, e auem era sòrt de que pendent diuèrsi dies compdaram damb grani escrivans deth genre nere en nòste territòri”.
Pera sua part, eth baile de Bossòst, Amador Marqués, soslinhe qu’”enguan eth hestivau da un saut fòrça gran, en tot doblar eth numerò de dies e d’escrivans que i participen. Demorem qu’aguesta dusau edicion sigue fòrça profitosa e que pòc a pòc se pogue convertir en un referent ena Val d’Aran e es Pirenèus”.
Ath delà, eth comissari deth hestivau, Jose Luis Muñoz, escrivan de renòm e que compde damb ua novèla ambientada ena Val d’Aran, Cazadores en la Nieve, considère qu’”era Val d’Aran amasse toti es condicionants entà acuélher un hestivau de genre nere. Dempús der exit dera prumèra edicion, afrontam aguesta naua edicion damb era conviccion de qu’era Val d’Aran se plaçarà en un lòc capdeuantèr ena literatura damb eth genre nere”.
Eth hestivau compdarà tanben damb d’autes activitats coma taules redones, conferéncies, presentacion de novèles, sessions de jazz e recitaus de poesia, entre d’autes.