Notícies Veir istoric
Era taxa toristica de Vielha e Mijaran beneficiarà era promocion toristica dera Val d’Aran
Damb era darrèra modificacion dera taxa, enguan se destinaràn 45.000€ a eveniments deth municipi e lèu 70.000€ ara promocion toristica a trauès de Foment Torisme Val d’Aran
Er ajuntament de Vielha e Mijaran a signat un acòrd damb Foment Torisme Val d’Aran entara cession dera requeptacion der impòst sus estades en establiments toristics deth municipi. Enquiara, Vielha e Mijaran cedie eth 30% dera taxa toristica ar organisme autonòm entara promocion toristica, mès damb era darrèra modificacion d’aguesta taxa, era cession ei deth 50%. D’aguest biais, as lèu 70.000€ que se cedien enquiara, s’ahigiràn 45.000€ que seràn destinadi a accions e eveniments damb er objectiu de potenciar eth municipi a nivèu toristic.
Segontes eth baile de Vielha e Mijaran, Juan Antonio Serrano:”Des der ajuntament de Vielha e Mijaran, gràcies ara bona gestion deth govèrn municipau, podem aufrir aguesta ajuda a Foment Torisme Val d’Aran entara promocion toristica deth territòri, que se veirà repercutit enguan en eveniments e accions que beneficien toristicaments ath municipi de Vielha e Mijaran”.
Des de 2013, quan s’establic aguesta taxa, er ajuntament de Vielha e Mijaran a cedit lèu 350.000€ entara promocion toristica dera Val d’Aran, en tot enfortir eth compromís de potenciar eth torisme deth territòri.
10/04/2018