Notícies Veir istoric
Er ajuntament de Vielha e Mijaran e era Fundacion Endesa inauguren eth projècte lumínic e istoric der arriu Nere
Pendent aguesta vèspe s’a inaugurat eth projecte lumínic e istoric der
arriu Nere, en nuclèu istoric de Vielha e Mijaran, ua iniciatiua der Ajuntament
deth municipi qu’a estat possible mercés ara collaboracion dera Fondacion
Endesa. Es trabalhs s’an realizat en tram der arriu ath sòn pas pes carrèrs
Major e Sarriulèra e an consistit ena installacion de 37 punts de lum as parets
fluviaus e ena collocacion de 2 pannèus informatius que repassen era istòria
deth cap-lòc dera Val d’Aran.
Aguesta accion, qu’a supausat
ua inversion de 55.000 èuros -finançadi pera Fondacion-, a coma objectiu
definir ua rota de contengut culturau que mòstre era istòria recenta deth
municipi des de diuèrsi punts emblematics der arriu. Ar acte d’inauguracion,
que s’a realizat aguest ser en pònt de Vielha, an participat eth baile e era
dusau tinent d’alcalde de Vielha e Mijaran, Juan Antonio Serrano e Maria
Vergés, respectivaments, eth director generau dera Fondacion Endesa, Carlos
Gómez-Múgica e era directora generau d’Endesa en Catalonha, Isabel Buesa.
Er arriu Nere a estat un punt
neuràlgic entath desvolopament sociau e economic deth municipi de Vielha e
Mijaran, e er objectiu deth projècte qu’aué s’a inaugurat ei utilizar eth sòn
marge coma èish vertebrador entà explicar era istòria recenta deth municipi e
es hèts qu’ac an mercat a trauès d’aguest itinerari culturau, de naut contengut
audiovisuau, que met en valor era istòria deth territòri.
Atau madeish, s’an plaçat 2
pannèus informatius enlumenadi damb tires LED blanques, entre es carrèrs Major
e Sarriulèra, qu’incorpòren fotografies istoriques atau coma breu explicacion
qu’aufrís ath visitant quate pincelades sus era istòria deth municipi mentre se
gaudís d’ua passejada ath costat der arriu.
Segontes eth baile de Vielha e
Mijaran, Juan Antonio Serrano,: “Damb
aguesta accion potenciam eth centre istoric deth pòble de Vielha, tant a nivèu
economic coma identitari, donques qu’es vesins se senteràn capinauti de
fomentar ua major visibilitat der arriu Nere. Atau madeish, mos cau arregraïr
ara Fondacion Endesa per auer invertit eth sòn esfòrç en aguest projècte”.