Notícies Veir istoric
Er Ajuntament de Vielha e Mijaran e era Fundacion Endesa inauguraràn aguest diuendres eth projècte luminic e istoric der arriu Nere
Es trabalhs que s’an realizat ath pas der arriu enes carrèrs Major, Sarriulèra e Arnals de Vielha, an supausat era installacion de 37 punts de lum enes parets fluviaus e ena collocacion de 2 pannèus informatius que repassen era istòria deth cap
Aguest diuendres, er ajuntament de Vielha e Mijaran amiarà a tèrme era inauguracion deth projècte luminic e istoric que s’a realizat en arriu Nere ath sòn pas per Vielha, en collaboracion damb era Fundacion Endesa. Aguest projècte a consistit ena installacion de 37 punts de lum enes parets fluviaus e ena collocacion de 2 pannèus informatius que repassen era istòria deth cap-lòc dera Val d’Aran. Era inversion finau d’aguest projècte a estat de 55.000€, finançadi intregalaments pera Fundacion Endesa.
Ar acte, qu’aurà lòc en pònt dera Avenguda Pas d’Arró entàs 20:00, i assistiràn eth baile der ajuntament de Vielha e Mijaran, Juan Antonio Serrano, era 2au tinent d’alcalde, Maria Vergés, eth director generau dera Fundacion Endesa, Carlos Gómez-Múgica e era directora generau d’Endesa en Catalonha, Isabel Buesa.
Segontes Juan Antonio Serrano, “èm tanplan satisfèts de poder recuperar ua part dera memòria istorica deth pòble, en tot enlumenar er arriu Nere, que tanben demoram que sigue un nau atractiu toristic deth municipi de Vielha e Mijaran. En aguest sens, volem arregraïr era collaboracion dera Fundacion Endesa, deth deputat provinciau, Francés Boya e des enterpreses que i an participat”.