Notícies Veir istoric
Er Ajuntament de Vielha e Mijaran a celebrat eth plen ordinari deth mes d’abriu
Era equipa de govèrn a presentat ua prepausa institucionau d’arrefús ar Estudi Informatiu de reforma dera N-230 deth Ministèri de Foment deth Tram Boca Nòrd deth Tunèl de Vielha - Termièra damb França, que fin finau non s’a votat
Eth plen der ajuntament de Vielha e Mijaran s’a amassat en session
ordinària pendent aguest dimèrcles entà amiar a tèrme era aprobacion de
diuèrsi punts dera orde deth dia. En aguest sens, s’a aprovat era
modificacion dera Ordenança Municipau Reguladora des Subvencions, atau
coma era Mocion presentada peth govèrn municipau d’Unitat d’Aran entà establir un sistèma damb major capacitat de redistribucion e reduccion des inegalitats.
D’aute
biais, era equipa de govèrn tanben a presentat ua prepausa
institucionau d’arrefús ar Estudi Informatiu e Estudi d’impacte
ambientau dera accion "Condicionament dera Carretèra N-230 de Sopeira
ena Termièra damb França: Tram Boca Nòrd deth Tunèl de Vielha -
Termièra damb França", que fin finau non s’a votat. En aguest sens, se
demorarà a que finalize eth periòde de presentacion d’allegacions des
deth territòri, entà generar un consens entre es desparières
institucions implicades.
Segontes eth baile de Vielha e Mijaran, Juan Antonio Serrano: "Cercam
que i age consens entre es desparières administracions e institucions
deth territòri d’arrefús as desparières alternatives prepausades peth
Ministèri de Foment, donques que supausarien un gran impacte ambientau,
toristic e economic en conjunt dera Val d’Aran
e especiuaments en municipi de Vielha e Mijaran. Per açò, demoraram a
que finalize eth periòde d’allegacions entà préner ua decision
definitiva".
Eth govèrn municipau non escarte era
possibilitat dera celebracion d’un plen extraordinari pendent aguesta
primauera entà generar ua decision conjunta deth consistòri en çò que
tanh ath projècte de reforma dera N-230.