Notícies Veir istoric
Er Ajuntament de Vielha e Mijaran amiarà a tèrme melhores en tot eth municipi pendent aguesta primauera.
Es intenses nheuades e es baishes temperatures d’aguest iuèrn an provocat desperfectes ena via publica e enes accèssi as poblacions de Vielha e Mijaran.
Aguesta setmana, Juan Antonio Serrano baile de Vielha e Mijaran, ath costat de Jacinto Cuny, còsso d’Infrastructures, Òbres e Servicis e er encargat dera brigada der Ajuntament, an revisat es desperfèctes provocadi pera nhèu e eth gèu pendent aguest iuèrn enes carrèrs de Vielha e Mijaran e er es accèssi enes pòbles deth municipi.
Era prevision ei qu’a compdar d’aguesta primauera se poguen realizar es prumères melhores en toti es vials publics, enes quaus se trabalharà en pavimentacion, trepaders e substitucion d’elements de mobiliari urban. Es accèssi as poblacions tanben s’an vist fòrça afectadi per iuèrn e ei de besonh intervier en toti eri.
Entà Juan Antonio Serrano, “toti es iuèrns es nòsti carrèrs patíssen desperfèctes pera nhèu e eth gèu der iuèrn, per açò, ei important planificar totes es accions a desvolopar per part der Ajuntament, entà qu’un còp entrada era primauera e eth bon temps, pogam iniciar es òbres e accions de forma rapida.”
09/03/2018