Notícies Veir istoric
Inaugurada ‘Catalunya Bombardejada’ ena sala d’exposicions de Vielha
Eth deluns 13 d’octobre s’inaugurèc era exposicion ‘Catalunya Bombardejada’ ena sala d’exposicions de Vielha, dera man deth baile de Vielha e Mijaran, Alex Moga, e eth director de Servicis Territoriaus en Lhèida, Naut Pirenèu e Aran, Jordi Curcó, en representacion deth Memorial Democràtic.
Era exposicion, que se realize en motiu deth 75 anniversari des bombardaments ara poblacion civiu en disparièrs scenaris de Catalonha pendent era Guèrra Civiu, siguec explicada peth guida d’Aran Culturau Claudio Aventín, a trauèrs des pannèus e plafons que conformen era mòstra, daurida de 19 a 21 ores de dimars a dimenges enquiath 15 de deseme.
Eth director de Servicis Territoriaus, Jordi Curcó, expliquèc que “es exposicions deth Memorial Democràtic servissen entà hèr istòria e arrebrembar-la. Non cau deishar aguesti hèts en oblit, se non recuperar era memòria e hè’c a trauèrs d’exposicions coma aguesta que transmeten un messatge de patz e concòrdia”.
Eth baile de Vielha, Alex Moga, declarèc que “aguesta exposicion servís entà ensenhar eth país catalan e part dera sua istòria. Er exit de visites ena sala d’exposicions ei gràcies a mòstres coma aguesta, que mos ajuden a crear ua agenda culturau potenta”.