Notícies Veir istoric
Vielha e Mijaran presente eth prumèr concors de cuertmetratges a trauès de mòbil “Vielha e Mijaran: Montanha e Cinema”
Eth concors s’enmèrque laguens deth projècte “Reiaume der Aneto-Interreg Poctefa” e es guanhadors se daran a conéisher enes Jornades Europèes de Cinema de Montanha que se celèbren es pròplèu 9 e 10 de març
Er Ajuntament de Vielha e Mijaran convòque, laguens des Jornades Europèes de Cinema de Montanha “Reiaume der Aneto-Interreg Poctefa” qu’organize es dies 9 e 10 de març de 2018, eth prumèr Concors de Cuertmetratges a trauès de telefon mòbil: “Vielha e Mijaran: Montanha e Cinema.
Es principaus objectius deth concors son dar a conéisher eth potenciau naturau, socioculturau e esportiu deth municipi de Vielha e Mijaran e de tot eth territori aranès e promòir eth respècte ath miei naturau, eth coneishement des montanhes araneses e es bones practiques enes espòrts que se desvolopen ena natura.
Es requisits entà participar en concors son: èster major de 18 ans, enregistrar es cuertmetratges a trauès de telefon mòbil ena Val d’Aran e damb ua durada d’entre 30 segons e 3 menutes coma maxim.
Es bases deth concors e era ficha d’inscripcion se trapen a disposicion ena plana web der Ajuntament de Vielha. Eth plaç maxim entara presentacion des òbres ei eth 6 de març tàs 14’00h.
Eth jurat serà presidit pera aupinista Edurne Pasaban, e ne formaràn part eth director deth Mendi Film Festival Javier Barayazarra, Nil Torremocha, director de Bumpy Films, Peru Ortiz de Zárate, expèrt en esquí de montanha e Maria Vergés, còsso de cultura der Ajuntament de Vielha e Mijaran.
Eth cuertmetratge guanhador serà projectat enes Jornades de Cinema de Montanha Interreg-Poctefa “Reiaume der Aneto” 2018. Atau madeish, ei previst que se projècte tanben enes festivaus de cinema que desvolopen es municipis de Benasque e Luchon, coma sòcis deth projècte europèu “Reiaume der Aneto” e s’alotjarà ena plana web der Ajuntament de Vielha e Mijaran. En aguesta linha, era casa de materiau esportiu e de montanha Haglöfs apòrte de forma gratuïta dues giquetes esportives e un morralet coma prèmi ad aguest concors.
Entà Maria Vergés, dusau Tinent d’Alcalde e còsso de cultura der Ajuntament de Vielha e Mijaran “aguest concors vò potenciar era creativitat artistica en nòste entorn naturau” e higie que “er hèt qu’es cuerts guanhadors se poguen presentar en Luchon e Benasque ei tanben ua forma de dar a conéisher es nòstes montanhes dehòra deth nòste parçan e ath temps que mos ajude a seguir trabalhant entà posicionar-mos coma un municipi referent des zònes de montanha”. Atau madeish, Vergés tanben a arregraït era collaboracion d’Edurne Pasaban e dera rèsta de membres deth jurat pera sua ajuda e participacion en aguest projècte, atau coma ara casa Haglöfs pera sua collaboracion desinteresada.
Descarga aciu es bases
Descarga aciu era inscripcion
23/02/2018