Notícies Veir istoric
Vielha e Mijaran exigís ua melhora inmediata deth servici de remassada de lordères
Er Ajuntament de Vielha e Mijaran a adreçat nauament ua carta ath Conselh Generau d’Aran entà hèr-li a arribar eth sòn malestar e preocupacion peth deficient servici ena remassada de lordères que s’a viscut es darrèri dies e qu’a balhat ua pessima imatge deth municipi e de tota era Val d’Aran e entà reclamar ara maxima institucion que realize es accions de besonh entà solucionar de forma inminenta aguesta grèu situacion
Pendent es hèstes de Nadau Vielha e Mijaran a artenhut còtes maximes d’ocupacion toristica, totun aguesta bona noticia contraste damb era mala imatge aufrida, autant en municipi coma ena rèsta d’Aran, pes grèus deficiéncies en servici de remassada de lordères. Contenedors plei a vessar an metut en evidéncia era manca d’eficàcia e d’efectius en aguest servici.
“Auem tornat a reclamar ath Conselh Generau, de qui depén aguest servici encara qu’ara sigue privatizat, que amie a tèrme es accions que siguen de besonh entà esvitar era grèu situacion qu’auem viscut aguesti nadaus” declaraue Juan Antonio Serrano, alcalde de Vielha e Mijaran, e higie que “resulte evident que, n’aguestes dates de maxima afloéncia, ei indispensable reforçar eth servici, e tot e qu’es ajuntaments sajam de collaborar en çò que podem, ei de besonh que se prenen mesures urgentes pr’amor que ne podem ne volem balhar aguesta mala imatge”.
Er Ajuntament de Vielha e Mijaran ja adrecèc setmanes endarrèr ua carta ath Sindic d’Aran en aguesta madeisha linha, en tot reclamar ua melhora en servici pr’amor que fòrça vesins s’adrecen entar ajuntament entà reclamar solucions sus aguest ahèr, que tot e non èster competéncia municipau, supause un grèu problèma entàs pòbles.
04/01/2018