Notícies Veir istoric
Era 98 Volta Ciclista a Catalunya arribarà en Vielha e Mijaran eth pròplèu 23 de març
Eth cap-lòc dera Val d’Aran acuelh era arribada e era gessuda de dues estapes de la Volta Ciclista a Catalunya que se realizarà deth 19 ath 25 de març
Vielha e Mijaran comence eth pròplèu mes de març de 2018 damb era recepcion de diuèrsi eveniments esportius. Eth prumèr eveniment dera sason ei era Volta Ciclista a Catalunya que celèbre era sua 98º edicion eth pròplèu 2018 e transcorrerà entre eth 19 e eth 25 de març.
Era arribada dera Volta Ciclista a Catalunya en Vielha e Mijaran se produsirà eth dia 23 de març en carrèr Garona e era gessuda dera següenta estapa se realizarà londeman, eth dia 24 de març des deth parcatge de Vielha.
Aguesta 98º edicion dera Volta Ciclista a Catalunya compdarà damb era participacion des dètz-e-ueit equipes Union Ciclista Internacionau (UCI) World Tour, era maximala division deth ciclisme internacionau, mès sèt equipes Continentaus Pro convidadi. An darrèr an, era organizacion d’aguest gran eveniment esportiu compde damb era participacion des melhors ciclistes e equipes deth mon.
Gràcies ara realizacion d’aguest eveniment, es establiments de Vielha compdaràn pendent es dies 23 e 24 de març damb era maximala aucupacion gràcies ara arribada des participaires dera Volta Ciclista a Catalunya, atau coma es sòns respectius acompanhants e era organizacion der eveniment.
Entà Juan Antonio Serrano, baile de Vielha e Mijaran “era arribada d’eveniments tan importants ath nòste territòri coma era Volta Ciclista a Catalunya, supausen diuèrsi beneficis entath municipi donques que tant era organizacion coma es participaires pernocten e consumissen es servicis de Vielha e Mijaran”. Ath delà Serrano soslinhe que “normauments eth mes de març ei un mes un shinhau loish en çò qu’a torisme se referís, per tant era recepcion dera Volta Ciclista a Catalunya supausarà un gran impuls economic entath territòri.”
Gràcies a eveniments d’aguesta magnitud, Vielha e Mijaran se contunhe reafirmant coma un municipi de referéncia esportiua gràcies ath sòn espectacular entorn e toti es servicis qu’aufrís.