Notícies Veir istoric
Vielha e Mijaran apròve es pressupòsti de 2018
Er Ajuntament de Vielha e Mijaran compde damb 5.725.524,93€ de despensa annau entath pròplèu an. Laguens deth pressupòst tanben s’an aprovat es inversions entàs òbres e melhores dera carretèra de Mont e Montcorbau e er apraiament des dipòs
Ager peth maitin se celebrèc eth plen ordinari der Ajuntament de Vielha e Mijaran en quau s’aprovèren es pressupòsti entath proplèu an 2018 damb vòts en favor d’Unitat d’Aran e Ciutadans e vòts en contra de Convergéncia.
Segontes eth baile Juan Antonio Serrano: “Aguesti pressupòsti asseguren era prestacion des servicis basics deth municipi, ath madeish temps que detalhen bères ues des òbres e melhores de besonh coma era melhora dera carretèra de Mont e Montcorbau e es melhores urgentes enes depòsits d’aigua de Vielha e de Vilac”. Ath delà Serrano ahig que “aguesti pressupòsti mèrquen de nau eth camin a seguir entara nòsta equipa de govèrn entath pròplèu an. Maugrat açò, lamentam eth vòt eth contra de Convergéncia, donques qu’ei eth prumèr còp que se placen en contra ena aprobacion iniciau d’un pressupòst annau”.
Eth tet de despenses entath pròplèu an 2018 ei de 5.725.524,93€, 1,89% mès qu’er an anterior. Ena partida de despenses, s’includissen es despenses deth madeish ajuntament de Vielha e Mijaran eth çò qu’a gestion, installacions e recorsi umans se referís, atau coma tanben se contemplen bères ues des inversions mès de besonh tant entath municipi coma entàs sòns pòbles. Entre aguestes inversions destacam era de besonh melhora der accès dera carretèra que junh es pòbles de Mont e Montcorbau que se tròbe eth mau estat e a de besonh èster apraiada urgentment. D’autra banda, tanben s’a destacat eth besonh de realizar òbres de melhora pena captacion d’aigua de Vielha e de Vilac, donques que se tròben en un estat deteriorat.
En aguest punt, volem destacar es empediments qu’an es ajuntaments per part deth govèrn estatau. Es ajuntaments que se tròben sense deute, coma ei eth cas der Ajuntament de Vielha e Mijaran, que maugrat auer assumit era gestion deth Palai de Gèu, seguís “punit” peth govèrn donques que non pòt destinar eth sòn excedent annau ara melhora des servicis publics. Tau coma declare Serrano “ei imprescindible que toti siguen conscienti d’aguesta penalització per part der estat, donques que maugrat auer es nòsti compdes sanejats tot e auer assumit era gestion des installacions deth Palai de Gèu de Vielha, seguim sense poder utilizar er exedent der an 2017 entara melhora deth nòste municipi e es besonhs des ciutadans”. Ath delà Serrano ahig que “era aplicacion dera era Lei d’Estabilitat en matèria de deute public, calerie que siguesse revisada donques qu’ajuste massa es pressupòsti annaus”.
23/11/2017