Notícies Veir istoric
Vielha acuelh aguesta dimenjada era Liga Catalana de Curling en Palai de Gèu
Dempús deth succès deth passat Bonspiel realizat enes installacions deth Palai de Gèu, eth Club Curling Val d’Aran organize era prumèra jornada de Liga Catalana ena quau participaràn clubs de diferenti lòcs de Catalonha.
Eth curling ei un des espòrts d’iuèrn que mès auge a agut enes darrèri ans, tant ena Val d’Aran coma en territòri espanhòu.
Gràcies as assolidatges obtengudi pendent er an passat peth Club Curling Val d’Aran, e tanben gràcies as melhores enes installacions deth Palai de Gèu, Vielha se place coma un lòc de referéncia entara practica d’aguest espòrt.
Aguesta dimenjada se celèbre era prumèra jornada de liga catalana de curling, que compdarà damb era participacion de naues equipes de tot eth territòri catalan coma eth club Puigcerdà Pioc’s Stones, Barcelona Martín, Sporting l’Ola, Barcelona Obrador, Puigcerdà Masters, Vau d’Aran Garona o The Walking Stones d’Andòrra.
Es oraris des partits son es següents: eth dissabte 28 se jogarà as 9ores, as 12ores, as 16ores e as 19ores. E eth dimenge 29 jogaràn as 9ores e as 12ores. Cada partit dur 1ora e 40 menutes
Hector Manero, un des responsables eth Club Curling Vau d’Aran soslinhe que “voi arregraïr a Alberto Lopez e Juan Antonio Serrano pera sua implicacion e eth gran trabalh que realizen pr’amor que pogam realizar aguestes jornades esportiues.” Ath delà, Manero destaque que “gràcies as melhores que se realizen en tet deth Palai de Gèu pendent aguesta setmana era pista de gèu se tròbe en ues condicions excellentes entà realizar era competicion d’aguesta dimenjada.”
Es pròplèus competicions entath Club Curling Val d’Aran se realizaràn deth 2 ath 4 de hereuèr deth pròplèu an 2018 damb era realizacion deth Campionat d’Espanha de dusau division masculina.
Juan Antonio Serrano, baile Vielha e Mijaran a declarat que “apuam ath Club Curling Val d’Aran e volem aufrir totes es facilitats entà potenciar eth curling”. Ath delà, Serrano soslinhe que “gràcies a d’aguestes competicions, Vielha e Mijaran s’assolide coma un territòri de referéncia laguens des espòrts de gèu. E tot açò ei gràcies ath trabalh conjunt der ajuntament de Vielha e amassa ath costat deth ímpetu e es assolidatges deth Club Curling Val d’Aran.”
26/10/2017