Notícies Veir istoric
Vielha e Mijaran acuelh eth 4º Congrès estatau d’Agents Forestaus e Mieiambientaus d’Espanha organizat peth Conselh Generau d’Aran
Eth congrès se centrarà ena seguretat des agents forestaus e mieiambientaus e tanben se realizaràn conferéncies e taules redones sus regulacion de politiques e sensibilizacion mieiambientau
Aué tàs 10 ores s’a presentat eth 4º congrès estatau d’Agents Forestaus e Mieiambientaus ena glèisa dera Nòsta Sra. De Mijaran. Era inauguracion deth congrès s’a amiat a tèrme pes autoritats competentes coma eth Sindic d’Aran, Carlos Barrera, era tinenta de baile der Ajuntament de Vielha e Mijaran, Maria Vergés e Albert Alins, director generau de Politiques de Montanha dera Generalitat. Eth congrès a estat organizat peth Conselh Generau dera Val d’Aran damb era collaboracion e patrocini der Ajuntament de Vielha e Mijaran, er Institut de Desvolopament e era Promocion de l’Alt Pirenèu e l’Aran (IDAPA) e era Deputacion de Lhèida.
Pendent es tres dies de congrès se debateràn tèmes restacadi damb era seguretat des Agents Forestaus e Mieiambientaus, eth mautractament animau, es diferentes tècniques forenses en trabalh de camp. Tanben se comentarà era prepausa de Lei basica estatau entà tot eth collectiu qu’actuauments se trabalhe en Congrès des Deputats, entre auti aspèctes restacadi damb eth trabalh des agents. Tanben se realizaràn exibicions e demostracions d’unitats canines e accions damb drones.
Aguest congrès, ath delà d’èster un punt d’amassada entàs autoritats e agents forestaus e mieiambientaus tanben ei un moment ideau entà qu’es assistents e es sues familhes coneishen eth nòste territòri e es sues tradicions.