Notícies Veir istoric
Vielha acuelh eth prumèr Bonspiel de curling dera sason
Eth Club Curling Val d’Aran a organizat aguest eveniment enes installacions deth Palai de Gèu en tot ajudar atau a Vielha a plaçar-se a nivèu estatau coma un lòc de referéncia entara practica d’eveniments d’aguest tipe
Era prumèra dimenjada d’octobre eth Club Curling Val d’Aran organizèc enes installacions deth Palai de Gèu de Vielha eth prumèr Bonspiel de Curling celebrat a nivèu nacionau.
Eth Bonspiel ère compausat per ueit equipes de sies clubs diferenti: NoName-B52 Curling, Club Esportiu Gèu Pisuerga, Harrikada Curling Taldea, Barcelona Red, Club de Curling Sporting l’Olla, Barcelona Black, Huelha House e es organizadors der eveniment, eth Club Curling Val d’Aran. Toti eri representauen un totau de 47 participaires.
Pendent eth diuendres se realizèren es prumèrs entrenaments e eth dissabte se realizèren es tres prumères rondes deth torneg. Era tarde deth dissabte servic a realizar un petit cors d’introduccion ath curling ath que assistiren 10 mainatges de Vielha e Mijaran e eth dimenge se disputèren es finaus. Er equip guanhador siguec Club de Curling Sporting l’Olla, seguit de Harrikada Curling Taldea e es barcelonesi Barcelona Red que demorèren eth tresau lòc.
Tant es participaires coma es organizadors manifestèren era sua satisfaccion peth bon desvolopament des jornades e pera oportunitat d’auer coneishut en Vielha e eth sòn entorn. Héctor Manero, responsable deth Club Curling Val d’Aran, declaraue que “èm fòrça contenti damb eth bon acuèlh qu’auem agut, encara qu’èm conscienti qu’aguest torneg se trobaue dehòra des terminis normaus des competicions de curling” Manero ahigie que “entara pròplèu competicion dera prumèra jornada dera Liga Catalana deth 28 ath 29 d’octobre en Palai de Gèu de Vielha, demoram auer eth madeish acuèlh e qu’era gent pogue vier a gaudir d’aguest espòrt”.
Juan Antonio Serrano, baile Vielha e Mijaran soslinhaue que “er Ajuntament de Vielha e Mijaran aufrís tot eth sòn supòrt ath Club Curling Val d’Aran pr’amor que realizen eth sòn espòrt enes melhores condicions possibles” e declaraue que “voi arregraïr ath Club Curling Val d’Aran era sua predisposicion pr’amor qu’aguest eveniment siguesse un succès e eth sòn trabalh entà mantier en perfècte estat es installacions dera pista de gèu deth Palai de Gèu pendent tota era dimenjada”
11/10/2017