Notícies Veir istoric
Er Ajuntament de Vielha e Mijaran demane explicacions ath departament d’ensenhament pera retalhada de mèstres ena Escòla Garona de Vielha.
Era retalhada acumulada supause onze professors mens d’ençà deth cors 2011-2012 en tot qu’eth nombre d’alumnes s’a mantengut e en tot qu’en Catalunya s’a començat aguest cors damb 5514 mèstres mès qu’er anterior
Er Ajuntament de Vielha e Mijaran a demanat per escrit explicacions ath Departament d’Ensenhament dera Generalitat pera retalhada de mèstres ena Escòla Garona de Vielha.
Aguest centre educatiu acuelh a 506 escolans, principaument deth municipi de Vielha e Mijaran, mès tanben dera rèsta dera Val d’Aran. Ei era escòla mès grana dera val d’Aran, e era dusau laguens des Servicis Territoriaus de Lleida.
Aguesta consiredabla retalhada en professorat a estat ua suspresa entar Ajuntament, ja que contraste damb er increment de places qu’a realizat era Generalitat en tota Catalunya, damb un totau de 5.514 mèstres mès qu’er an passat.
Des der Ajuntament de Vielha e Mijaran s’an demanat explicacions per escrit ath Departament d’Ensenhament, ath temps que s’a lamentat que s’age prenut aguesta decision, en tot incrementar eth grèuge comparatiu damb era rèsta de Catalunya. Tà Maria Vergés, còsso d’Ensenhament der Ajuntament manifestaue que “non ei comprensible qu’ua des escòles mès importantes deth Pirenèu age, entad aguest cors 2016-2017, 11 mèstres mens que hè 4 ans se s’an mantengut eth nombre d’alumnes, e se Catalunya encete eth cors damb mès mèstres qu’er an passat ”.
Juan Antonio Serrano, alcalde de Vielha e Mijaran declare que ‘era Val d’Aran patís es decisions d’ua Generalitat enfocada principaument a d’auti ahèrs. Demanan explicacions pera retalhada de mèstres, mès tanben reclamam que s’arture era retalhada de servicis en nòste municipi en favor de d’auti territòris deth Pirenèu de Catalunya” e higie que “era Val d’Aran que se trape luenh des granes ciutats causa que justifique qu’es sòns ciutadans agen servicis apròp”.