Notícies Veir istoric
Er Ajuntament de Vielha e Mijaran paralise es licéncies d’abitatges d’usatge toristic
Se suspen era concession de naues licéncies damb ua moratòria d’un an entà estudiar e regular aguest tipe de lotjaments e ath sòn torn favorir eth mercat de loguèr entàs familhes e trabalhadors que non tròben abitatge er eth municipi.
Aué, dijaus 14 de seteme, s’a celebrat eth Plen ordinari der Ajuntament de Vielha e Mijaran en quau s’a aprovat era moratòria d’un an enes abilitacions administratives entad usatge d’abitatges toristics en Vielha e Mijaran.
Es estatges o cases dedicades exclusivaments ar usatge d’en tot víuer toristiques e vacacionals per mesi e setmanes an creishut notablaments enes dus darrèri ans en nòste municipi. Aguesti estatges vacacionals supausen un problèma entàs vesins e vesies de Vielha e Mijaran, donques que hèn montar eth prètz deth loguèr des cases o estatges e dificulten er accès de familhes en mercat de loguèr. Ath delà, tanben supause ua problematica entad aquera gent que ven a trabalhar era sason d’iuèrn o d’estiu, donques que non tròben cases entà poder residir a causa deth gran còst economic que supause. D’aguesta forma, tant trabalhadors coma empresaris se ven prejudiciadi. Pendent er iuèrn, era Val d’Aran acuelh un gran nombre de professionaus entà poder corbir lòcs de trabalh imprescindible enes servicis toristics qu’aufrís era Val d’Aran.
Juan Antonio Serrano baile de Vielha e Mijaran a declarat que “en plen d’aué, auem aprovat ua moratòria entara concession d’estatges toristics. Mos trobam damb qu’aguesti estatges supausen un problèma entara gent que viu e trabalhe en Vielha e Mijaran e en rèste dera Val d’Aran, donques que non tròben cases entà lotjar-se e donques non pòden complir damb es sòns contractes de trabalh.” Ath delà, Serrano remèrque que “er an 2015 aprovèrem ua pujada fòrça significativa dera taxa des estatges de loguèr que passèc d’èster de 41€ a 600€. Maugrat aguesta mesura, aguesti estatges contunhen en tot proliferar. Peth moment paralisaram era concession d’aguest tipe d’abitatges pendent un an e, trabalham entà cercar solucions a d’aguesta problematica qu’afècte a Vielha e Mijaran e a tot eth territòri.”
14/09/2017