Notícies Veir istoric
Vielha compdarà damb un airau de parcatge entà caravanes e autocaravanes.
Eth principau objectiu dera creacion d’aguesta infrastructura ei convertir Vielha e Mijaran en un municipi toristic de referéncia enes Pirenèus e potenciar era economia locau.
Eth passat 24 de junhsèga, er ajuntament de Vielha e Mijaran treiguec a concors er arrendament d’ua parcèla urbana deth municipi damb er objectiu de crear un parcatge de caravanes e autocaravanes.
Era explotacion d’aguesta parcèla anarà a cargue d’ua enterpresa privada. Eth tèrme de presentacion de sollicituds ja se tròbe finalizat des deth dia 8 d’agost. A dia d’aué, des der ajuntament de Vielha e Mijaran mos trobam en procès d’adjudicacion e ara demora deth liurament des documents de besonh per part des enterpreses interessades entara explotacion dera parcèla.
Er aument deth torisme de caravanes e/o autocaravanes s’establís en nòste país. Se tracte d’un torisme fòrça important e a tier en compde per toti aqueri municipis toristics. Des der ajuntament de Vielha e Mijaran, èm conscienti dera importància qu’a aguest tipe de torisme entath nòste territòri, per açò credem qu’ei de vitau importància que Vielha age un parcatge de autocaravanes. Eth principau objectiu dera creacion d’aguest servici ei convertir Vielha e Mijaran en un municipi toristic de referéncia enes Pirenèus e en sector deth caravaning.
Entà Juan Antonio Serrano, baile de Vielha e Mijaran “ei de vitau importància era creacion d’un lòc de parcatge entà autocaravanes e caravanes, donques qu’ath delà d’èster un servici de besonh entara captacion deth public autocaravanista, tanben se convertirà en un servici qu’apuarà era economia locau gràciess ara creacion de lòcs de trabalh en municipi.”
01/09/2017