Notícies Veir istoric
Recepcion ath nau president dera RFEDI, er aranés May Peus
Ena sala de plens der Ajuntament de Vielha e Mijaran
Eth diuendres 17 d’octobre er Ajuntament de Vielha e Mijaran a arrecebut ar aranés May Peus, en aumenatge ath sòn recent nomentament coma president dera Real Federación Española Deportes de Invierno (RFEDI), en ua acuelhuda damb apròp de cinquanta persones.
Era recepcion, qu’a agut lòc ena sala de plens deth consistòri de Vielha, a anat dirigida per alcalde deth municipi, Alex Moga, qu’a autrejat ua placa de reconeishement ar aranés May Peus peth sòn nau cargue, donques eth 20 de seteme siguec escuelhut president dera RFEDI.
Pendent er acte, Alex Moga a declarat que “ei un orgulh qu’ua persona deth país sigue eth president d’ua institucion tan importanta coma era RFEDI. A compdar der Ajuntament de Vielha e Mijaran te dam tot eth nòste supòrt, e demoram qu’era Val d’Aran contunhe en tot auer eth sagèth de nhèu, donques er espòrt d’iuèrn a fòrça pes ena nòsta economia”. Fin finau, er alcalde de Vielha a arrebrembat “era importància entath país èster enes Jòcs Olimpics d’Iuèrn de Barcelona 2026”.
May Peus a volut “arregraïr ar Ajuntament de Vielha e Mijaran eth sòn supòrt, donques entà jo ei un orgulh préner aguesta responsabilitat. Ei un cargue peth qu’auem lutat, pr’amor creiguíem qu’es espòrts d’iuèrn non portauen era linha que les calie portar”. “Tostemp aurè era Val d’Aran en cap e en còr entà deféner es interèssi deth nòste país. De cara as Jòcs de 2026, auem començat a mòir un plan estrategic entà demanar competicions internacionaus, tanben ena val, e mostrar eth nòste país a tot eth mon”, a apuntat eth president dera RFEDI.
Fin finau, May Peus a anonciat qu’eth 27 d’octobre se realizarà en Salardú, eth sòn pòble natau, era presentacion des estructures esportiues dera RFEDI, damb era preséncia de diuèrsi esportistes presents enes Jòcs Olimpics de Sochi 2014, coma Carolina Ruiz, Paul de la Cuesta o er aranés Alex Puente.
17/10/2014