Notícies Veir istoric
Dusau edicion d’ Era Flower Vielha pendent es dies 4, 5 e 6 d’agost.
Er Ajuntament de Vielha e Mijaran se prepare entà qu’eth cap-lòc dera Val d’Aran se convertisque en scenari principau de diferenti eveniments coma talhèrs, desfilades de mòda e era concentracion de forgonetes.
Vielha e Mijaran se prepare entara celebracion dera dusau edicion deth hestivau Era Flower Vielha 2017. Dempús der excellent acuèlh ciutadan dera prumèra edicion deth passat ostiu damb un nombre aproximat de 800 participaires, es entitats organizadores e collaboradores an tornat a dessenhar ua dimenjada hippie en Vielha e Mijaran pendent es dies 4, 5 e 6 d’agost.
Diuèrses associacions dera zòna collabòren damb Ère Flower Vielha. Era Associacion d’ Artesans dera Val d’Aran organize eth Mercat ambulant Hippie artesanau e era Associacion de monitors Aran-Thal prepararà jòcs entà mainatges. Ath delà, era hèsta compdarà damb infables, talhèrs de maquillatges, disfresses e hèsta dera esgluma entre autes activitats. Ath delà, de totes es activitats previstes, destaque era preséncia d’un grop de balh de Bollywood e un aute de Zumba, e era actuacion musicau deth grop Dwayna.
Cau destacar era collaboracion especiau en aguesta edicion dera Associacion ADDA (persones damb andicapat), que realizaràn era elaboracion de clauers e pins entàs nòsti esponsors, coma arrebrembe dera hèsta.
Des der Ajuntament de Vielha e Mijaran collaboram actiuaments damb Era Flower en tot aufrir supòrt damb es installacions e infrastructures qu’aufrís Vielha. Se tracte d’un eveniment qu’agranís de forma notabla es activitats a realizar pendent era prumèra dimenjada d’agost qu’atreirà era atencion de toti aqueri que se tròben ena Val d’Aran.
Entà Juan Antonio Serrano, baile de Vielha e Mijaran “eth succès qu’auec Era Flower der an passat, siguec eth motor entà que en aguesta dusau edicion s’agen aumentat es activitats entà toti. D’aguesta forma, pendent es dies dera celebracion dera hèsta, Vielha agranirà eth sòn ventalh d’activitats a realizar tant entàs locaus coma entàs toristes que mos visiten. Ath delà, aguest tipe d’eveniments supausen un impacte positiu eth toti es establiments deth territòri e encara mès en Vielha”.