Notícies Veir istoric
Vielha Swim Team, eth prumèr club de natacion deth territòri aranés.
Era aufèrta esportiua de Vielha e Mijaran se ve notablaments melhorada pera creacion deth Vielha Swim Team.
Aguesta tarde ara 18h s’a realizat era presentacion de Vielha Swim Team ena Sala de Plens der Ajuntament de Vielha e Mijaran.
Es fondadores deth club de natacion Vielha Swim Team, Mireia Suesta e Montse Cuixart, compden damb mès de dètz ans d’experiéncia coma encargades dera piscina deth Palai de Gèu. Ara, a causa dera grana demanda des darrèri ans per part des mainatges que entrenauen, atau coma a naui interessadi, decidiren embarcar-se er aguest projècte que plaçarà era natacion aranesa coma un referent a nivèu estatau.
Era presentacion deth prumèr club de natacion deth territòri s’a amiat a tèrme dera man des entrenadores e tanben deth president deth club, Albert Ribera. Ribèea a destacat que “coma president e coma pair creigui que gràcies as clubs se genèren grani esportistes que pòrten en nòste país a èster un referent esportiu”.
Pendent era presentacion Suesta e Cuixart an explicat com serà eth foncionament deth club en foncion dera demanda qu’agen. Organizaràn diferenti grops adaptadi as sòns besonhs e objectius. Eth club de natacion ei daurit tant ad aqueri que volguen realizar competicion coma enta d’aqueri que desiren un entrenament mès personsalitzat. Tanben aufriràn stages e un ample programada d’activitats, entre ues autes.
Des der Ajuntament de Vielha e Mijaran mos auem comprometut damb eth club de natacion damb era volontat de contunhar era activitat e melhorar eth servici. Gràcies ara creacion deth club, ath delà d’aufrir un servici excellent a toti aqueri que volguen entrenar o realizar competicion. Sense dobte, se tracte d’ un gran pas entà seguir plaçant Vielha coma un municipi destacat entad acuèlh d’eveniments esportius.
Juan Antonio Serrano, baile der Ajuntament de Vielha e Mijaran, a declarat que “gràcies as diferentes activitats qu’an realizat enquia ara es entrenadores, era demanda de natacion a creishut notablaments en territòri. Personalaments sò fòrça content donques creigui que s’a trobat era formula perfècta entà seguir damb aguesta activitat e tanben melhorar eth servici“ .