Notícies Veir istoric
Vielha aurà balhs tradicionaus pendent tot er ostiu.
Era plaça dera glèisa de Vielha se convertís pendent tot er ostiu en principau scenari entà gaudir deth folklore e tradicion deth territòri.
Era plaça dera glèisa de Vielha se convertís pendent es mesi de junhsèga e agost en scenari principau entà conéisher eth folklore e era tradicion musicau e culturau deth territòri.
Er Ajuntament de Vielha e Mijaran signèc convènis de collaboracion damb es dues associacions de dances tradicionaus de Vielha: Es Fradins de Vielha e Era Còlha de Santa Maria de Mijaran. Er objectiu d’aguesti convènis ei apuar as entitats ena sua labor e fomentar era difusion, dinamizacion e conservacion deth folklore aranés, ath delà d’aufrir pendent er an bères representacions en municipi.
Ath delà des accions organizades per Ajuntament de Vielha e Mijaran, eth programa d’Estiu Culturau organizat peth Conselh Generatz d’Aran, acabarà de completar es accions dera plaça dera glèisa de Vielha damb representacion de balhs aranesi a cargue de diuèrsi grops de dança que son repartidi per tota era Val d’Aran.
Era plaça dera glèisa de Vielha se convertirà eth melhor scenari pr’amor qu’es toristes coneishen e gaudisquen deth folklore e es tradicions dera Val d’Aran. Es representacions en Vielha seràn es següentes: eth diuendres 28 de junhsèga balhs a cargue des Corbilhuèrs as 20h; eth dijaus 3 d’agost balhs a cargue des Sautarets de Bossòst as 20h; eth dissabte 19 d’agost balhs d’Era Còlha Santa Maria de Mijaran tàs 18h e eth dissabte 26 d’agost as 20:15h damb Es Fradins de Vielha tanben ena plaça dera glèisa de Vielha.
Entà Juan Antonio Serrano, baile de Vielha e Mijaran “aguestes accions son eth melhor exemple tà qu’es visitants que vengen a passar es sues vacances ath nòste territòri comprenen e senten era cultura e es tradicions uniques dera Val d’Aran.” Serrano tanben ahig que “gràcies as grops de dances es tradicions dera Val d’Aran arriben en un nombrós public gràcies as sues accions tant laguens com dehòra deth territòri ”.