Notícies Veir istoric
Vielha e Mijaran apròve per unanimitat es Compdes Generaus de 2016
Eth plen celebrat aguest maitin a aprovat per
unanimitat es Compdes Generaus de 2016 que s’an barrat damb excedent e se poderà
saldar atau es deutes bancaris e tanben s’a aprovat era mocion sus era creacion
des jutjats provinciaus entà resòler es procediments sus es clausules solèr des
ipotèques.
Era corporacion municipau a aprovat per unanimitat en plen ordinari celebrat aué dijaus 13 de junhsèga, es Compdes Generaus de 2016 dempús qu’es servicis tecnics agen barrat er exercici comptable. Eth remanent de tresoreria a permetut saldar toti es deutes des crèdits ipotecaris subrogadi pera dissolucion de VIGESA, era quau causa a liberat ar Ajuntament d’un passiu qu’arrossegaue dempús de hè ans a trauès dera empresa gestora. Era equipa de govèrn a agut coma prioritat sanejar es compdes municipaus entà garantir era solvéncia economica dera entitat e perméter naues inversions entath municipi. Juan Antonio Serrano, baile de Vielha e Mijaran declaraue que “ei ua satisfaccion poder presentar es compdes en aguest estat" e higie que "a despièch qu’a supausat un gran esfòrç per çò qu’ei era gestion e priorizacion des accions, auem podut superar aguesta fasa damb granties ". En aguest sentit er alcalde manifestaue que "se ben ei cèrt qu’enquiath moment auèm hèt un esfòrç titànic entà qu’era situacion deth Palai de Gèu non afècte era ciutadania, aguest contunhe d’èster un tèma delicat que sajam de resòver". Pendent eth plen s’a aprovat tanben, damb eth consentiment de toti es grops politics, era mocion entara creacion des jutjats provinciaus en Vielha, que preten resòver es procediments sus es clausules solèr des ipotèques. Eth Conselh Generau deth Poder Judiciau establic que cada província aurie un jutjat centralizat entà tramitar es demandes, mès aguest hèt aluenhe es ciutadans de Vielha e Mijaran as que les calerie desplaçar-se cap a Lhèida entà realizar era gestion, en tot èster reprimidi es drets de reclamacion ath delà de pèrder servicis publics aufridi dera proximitat comarcau estant.
13/07/2017