Notícies Veir istoric
Vielha e Mijaran reclame ath Govèrn poder invertir er excedent annau deth sòn pressupòst
Eth Plen der Ajuntament de Vielha e Mijaran a aprovat aguest maitin era mocion promoiguda pera FEMP er era quau se reclame recuperar era capacitat d’inversion des municipis.
Per acòrd dera corporacion municipau en Plen Ordinari celebrat eth 24 de mai de 2017, s’a aprovat que des der Ajuntament de Vielha e Mijaran se reclame ath Govèrn era inversion der excedent, qu’er en cas d’aguest municipi ei de 1.284.310,38€.
A causa des restriccions imposades per Estat damb era Lei Organica d’Estabilitat Pressupostària es Ajuntaments, coma eth de Vielha e Mijaran, non pòden disposar deth sòn excedent entà atier es sòns besonhs d’inversion.
Era mocion aprovada a estat promoiguda pera Federacion Espanhòla de Municipis e Províncies, e reclame ath Govèrn d’Espanha qu’adòpte iniciatiues legislatiues entà poder reinvertir er excedent sense auer de generar naui ingrèssi pera sua madeisha quantia.
Entà Juan Antonio Serrano, baile de Vielha e Mijaran “Vielha e Mijaran a de besonh recuperar capacitat d’inversion entà poder atier es besonhs dera nòsta ciutadania e poder executar toti es projèctes que mos comprometérem, e resulte indispensable qu’eth Govèrn Español modifique aguesta nòrma injusta.”