Notícies Veir istoric
Amassada en Vielha dera Associacion deth Municipalisme per Aran
Es bailes aranesi s’an amassat aguest maitin en Vielha entà informar-se sus era arribada dera fibra optica enes sòns municipis e sus era possibilitat d’establir ua taxa municipau as enterpreses electriques per utilizacio deth domèni public
Juan Antonio Serrano, baile de Vielha e Mijaran e president dera Associacion deth Municipalisme per Aran a convocat aué, en Ajuntament de Vielha e Mijaran, as bailes des municipis aranesi tà ua amassada damb es responsables dera Associacion de Municipis Generadors d’Energia Electrica dera Provincia de Lleida e es sòns enginhèrs en telecomunicacions, entà presentar-les eth Plan Director des Projèctes de desplegament dera fibra optica qu’aguesti an elaborat.
Es tecnics an explicat as bailes eth besonh d’actuar e d’arténher solucions entà hèr arribar as municipis que se tròben dehòra des plans d’inversion des grani operadors, un hilat de fibra optica a trauès des linhes existentes. En aguest sens s’a coïncidit en qu’era melhora dera conectivitat resulte ua accion urgenta entà poder equiparar aguesti municipis a uns auti en çò que tanh a accès ara informacion e possibilitat de desvolopament d’activitat economica, atau coma en fòrça d’eri ena rèsta deth Pirenèu, entà lutar contra era despoblacion.
En aguesta madeisha reünion s’a tractat, a trauès des bufets d’avocats Gonzalo Abogados / Cudós Consultors, sus era naua situacion creada dempús dera senténcia judiciau deth Tribunau Constitucionau qu’obligue as empreses electriques a pagar as municipis pera ocupacion de domèni public des linhes de nauta tension. En cas des municipis aranesi cada ajuntament aurà de realizar un prumèr estudi entà calcular a guaire pujarie aguesta quantitat, ahèr sus eth qu’er Ajuntament de Vielha e Mijaran a ja començat a trabalhar.
21/03/2017