Notícies Veir istoric
Vielha serà eth centre neuralgic dera Copa deth Mon d’Esquí de Montanha
Era Val d’Aran Skimo World Cup se disputarà en entorn de Baqueira-Beret es dies 8 e 9 d’abriu e serà era darrèra pròva des cinc puntuables entara Copa deth Mon d’Esquí de Montanha dera ISMF
Eth dissabte 8 d’abriu se disputarà era pròva individuau, en marc dera 59a edicion deth Ralli deth CEC, e eth dimenge 9 d’abriu era pròva verticau, en marc d’Era Pujada.
Parallèlaments se celebraràn es pròves Open e es puntuables entara Copa Catalana d’Esquí de Montanha dera Federacion d’Entitats Excursionistas de Catalonha (FEEC).
Dempús de quate pròves era copa deth mon se decidirà ena Val d’Aran, tant ena modalitat individuau coma verticau. Era emocion serà garantida enquiara fin, en ua competicion a on Kilian Jornet ei er actuau campion mondiau. Es inscripcions seràn dubèrtes enquiath dia 5 d’abriu e se pòden formalizar a trauès dera web oficiau dera pròva: valdaranskimoworldcup.cat
En acte de presentacion que s’a realizat ena sedença deth CEC an intervengut: Luís Carlos Medina, vicesindic deth Conselh Generau d’Aran; Juan Antonio Serrano, baile de Vielha e Mijaran; Lluís Gómez, resposanble de relacions institucionaus deth CEC; Joan Garrigós, president dera FEDME; Lluís Simó, vicepresident dera FEEC; Pep Albós, cap de marqueting de Baqueira Beret; Xavi Pocino, membre deth Centre Excursionista d’Aran; e Tòn Massagué, director dera Val d’Aran Skimo World Cup.
Juan Antonio Serrano, a declarat: “Des de que èm era equipa de govèrn auem apostat entà compdar damb pròves de fòrça nivèu en Vielha. Per prumèr còp s’harà ua pròva ena que era caplòc aranesa será protagonista. Vielha serà eth centre neuralgic dera pròva, a on se celebraràn toti es actes dera copa dehòra deth enquadre competitiu. Auram as melhors esportistes d’esquí de montanha a nivèu mondiau lotjadi ena caplòc aranesa”.