Notícies Veir istoric
Juan Antonio Serrano, baile de Vielha e Mijaran, s’a amassat aué damb era Sosdelegada deth Govèrn, Inma Manso
Entà conéisher eth projècte de melhora dera N-230 entre era boca nòrd deth tunèl de Vielha e Aubèrt
Era Sosdelegada deth Govèrn en Lhèida, Inma Manso, a recebut aguest maitin ath baile de Vielha, Juan Antonio Serrano, que s’a interessat peth projècte de melhora deth tram entre era boca nòrd deth Tunèl de Vielha e eth nuclèu d’Aubèrt ena carretèra N-230.
En aguest sens, Inma Manso a explicat qu’eth Ministèri de Foment redigís er estudi informatiu entath condicionament e melhora d’aguest tram dera N-230 qu’includís er estudi de diuèrses possibilitats en traçat dera carretèra qu’eviten eth pas des veïculs peth casc urban de Vielha. Un còp se finalize aguest estudi informatiu, serà sometut ath procediment d’informacion publica, segontes era informacion facilitada peth Ministèri.
Era Sosdelegada deth Govèrn s’a comprometut a facilitar ua amassada entre eth Secretari d’Estat d’Infrastructures deth Ministèri de Foment, Julio Gómez Pomar, e eth baile de Vielha entà tractar sus aguest projècte de melhora.
D’aute biais, eth baile de Vielha a transportat ara Sosdelegada era peticion de senhalizar eth Parc Nacionau d’Aigüestòrtes e Estanh de Sant Maurici en hilat de carretères estataus dera província de Lhèida e, de forma especiau, en municipi de Vielha damb era finalitat de promòir e hèr conéisher aguest espaci naturau entre eth conjunt de toristes, tant nacionaus coma internacionaus, que visiten aguesta poblacion aranesa.